തിരൂര്‍: കരിപ്പൂര്‍ വിമാനത്താവളത്തില്‍ നിന്ന് പുറത്തിറങ്ങിയ ശേഷം കാണാതായ യുവാവിനെ ആഴ്ചകള്‍ക്ക് ശേഷം മൈസൂരില്‍ കണ്ടെത്തി. ബന്ധുക്കളും പൊലിസും ചേര്‍ന്നുനടത്തിയ അന്വേഷണത്തിലാണ് തിരൂര്‍ കോട്ട് കല്ലിങ്ങല്‍ ഇലനാട്ടില്‍ നൗഷാദി(39)നെ കണ്ടെത്തിയത്.
ഓഗസ്റ്റ് 31ന് റാസല്‍ഖൈമയില്‍ നിന്ന് എയര്‍ഇന്ത്യ എക്‌സ്പ്രസില്‍  കരിപ്പൂര്‍ വിമാനത്താവളത്തിലെത്തിയ നൗഷാദിനെ പിന്നീട് കാണാതാകുകയായിരുന്നു. കരിപ്പൂര്‍ പൊലിസ് വിമാനത്താവളത്തിലെ സി.സി.ടി.വി ദൃശ്യങ്ങള്‍ പരിശോധിച്ചപ്പോള്‍ നൗഷാദ് വിമാനത്താവളത്തിന് പുറത്തിറങ്ങിയതായി കണ്ടെത്തിയിരുന്നു. കോഴിക്കോട് കേന്ദ്രീകരിച്ചായിരുന്നു ആദ്യ അന്വേഷണം. ദിവസങ്ങള്‍ക്ക് ശേഷം ഗള്‍ഫില്‍ പോകുന്നതിന് മുമ്പ് ഉപയോഗിച്ചിരുന്ന മൊബൈലില്‍ നിന്ന് നൗഷാദ് റാസല്‍ഖൈമയിലേക്ക് വിളിച്ചതായി വിവരം ലഭിച്ചു. തുടര്‍ന്ന് സൈബര്‍ സെല്‍ സഹായത്തോടെ നടത്തിയ അന്വേഷണത്തില്‍ മൈസൂരില്‍ ഉള്ളതായി വിവരം ലഭിക്കുകയായിരുന്നു.