നിലമ്പൂര്‍: നിലമ്പൂര്‍ ഉള്‍വനത്തില്‍ മാവോയിസ്റ്റുകള്‍ രക്തസാക്ഷി ദിനാചരണം നടത്തി. പൊലിസ് മാവോയിസ്റ്റുകള്‍ക്കു വേണ്ടി തെരച്ചില്‍ നടത്തുകയും അതീവ നിരീക്ഷണം നടത്തുകയും ചെയ്യുമ്പോള്‍ തന്നെയാണു തോക്ക് ധാരികളായ പന്ത്രണ്ട് മാവോയിസ്റ്റുകള്‍ പട്ടാപ്പകല്‍ കാട്ടില്‍ സംഗമിച്ചത്. ചുവന്ന തുണിക്കൊണ്ടുള്ള രക്തസാക്ഷി സ്തൂപത്തിനു മുന്നില്‍ മുഷ്ടിചുരുട്ടി മുദ്രാവാക്യം വിളിക്കുന്നതും സല്യൂട്ട് ചെയ്യുന്നതും ഫോട്ടോയിലുണ്ട്. ഫോട്ടോയില്‍ മുഖം വ്യക്തമല്ല. ഒരു സ്ത്രീ ഉള്‍പ്പെടെ 12 പേരാണു ചിത്രത്തില്‍ കാണുന്നത്. സി.പി.ഐ മാവോയിസ്റ്റ് നാടുകാണി ദളം നടത്തിയ രക്തസാക്ഷിദിനാചരണത്തിന്റെ ചിത്രങ്ങളാണിവയെന്ന് ഇതോടൊപ്പം നല്‍കിയിട്ടുള്ള ലഘുലേഖ ചിത്രത്തിലും സൂചിപ്പിക്കുന്നു.