അമ്പലപ്പുഴ: സുപ്രഭാതം വാര്‍ത്ത കണ്ണന്റെ ഗോക്കള്‍ക്ക് തുണയായി. അധികൃതരുടെ ഇടപെടല്‍മൂലം അമ്പലപ്പുഴ ശ്രീകൃഷ്ണസ്വാമി ക്ഷേത്രത്തിലെ ഗോശാലയിലെ ഗോക്കള്‍ക്ക് തീറ്റ ലഭിച്ചുതുടങ്ങി.  സുപ്രഭാതം വാര്‍ത്തയെ തുടര്‍ന്ന് ഇന്നലെ അമ്പലപ്പുഴ തെക്ക് ഗ്രാമപഞ്ചായത്ത് പ്രസിഡന്റ്  ജി. വേണുലാല്‍, അംഗം  എസ് ശ്രീകുമാര്‍ എന്നിവര്‍ ഗോശാലയിലെത്തി ഗോക്കള്‍ക്ക് തീറ്റ നല്‍കാന്‍ സംവിധാനമൊരുക്കുകയായിരുന്നു.
  ദേവസ്വം ബോര്‍ഡ് നിയോഗിച്ചിരിക്കുന്ന ജീവനക്കാര്‍ ശമ്പളവര്‍ദ്ധനവ് ആവശ്യപ്പെട്ട് നാലുദിവസമായി ഗോശാലയിലെ അമ്പതോളം ഗോക്കള്‍ക്ക് തീറ്റ നല്‍കുന്നില്ലായിരുന്നു. തിരുവോണ നാളില്‍പ്പോലും  ഗോക്കള്‍ പട്ടിണിയിലായിരുന്നു. ഇത് വാര്‍ത്തയായതിനെതുടര്‍ന്നാണ് പഞ്ചായത്ത് അധികൃതരെത്തി ഗോക്കള്‍ക്ക് തീറ്റ നല്‍കാന്‍ ജീവനക്കാര്‍ക്ക് നിര്‍ദ്ദേശം നല്‍കിയത്.