തൊടുപുഴ:   റോഡ് സുരക്ഷാദിനത്തോടനുബന്ധിച്ച് വിദ്യാലയങ്ങള്‍ കേന്ദ്രീകരിച്ച് റോഡ് സുരക്ഷാ പ്രതിജ്ഞയെടുത്തു. പരിപാടിയുടെ തൊടുപുഴ വിദ്യാഭ്യാസജില്ലാതല ഉദ്ഘാടനം തൊടുപുഴ സെന്റ് സെബാസ്റ്റിയന്‍സ് സ്‌കൂളില്‍ ജോയിന്റ് ആര്‍ടിഒ ജോളി ജോര്‍ജ് നിര്‍വഹിച്ചു. മോട്ടോര്‍ വെഹിക്കിള്‍ ഇന്‍സ്‌പെക്ടര്‍മാരായ സി കെ എബ്രഹാം, എ അജിത്കുമാര്‍ എന്നിവര്‍ ബോധവല്‍ക്കരണ സന്ദേശം നല്‍കി. സ്‌കൂള്‍ ലീഡര്‍ അര്‍ച്ചന മധു, ഫാസില്‍ സജീവ് എന്നിവര്‍ പ്രതിജ്ഞ ചൊല്ലിക്കൊടുത്തു. സംസ്ഥാനത്ത് വര്‍ധിക്കുന്ന റോഡപകടങ്ങള്‍ കുറയ്ക്കുന്നതിന് ഹെല്‍മറ്റ്, സീറ്റ് ബെല്‍റ്റ് എന്നിവയുള്‍പ്പെടെയുള്ള സുരക്ഷാസംവിധാനങ്ങള്‍ ഉപയോഗിക്കേണ്ടതിന്റെ ആവശ്യകത കുട്ടികളെ ബോധ്യപ്പെടുത്തുന്നതിനാണ് പരിപാടി സംഘടിപ്പിച്ചത്. മണക്കാട് എന്‍എസ്എസ് എച്ച്.എസ്.എസില്‍ നടന്ന  പരിപാടിക്ക് എഎംവിഐ എ എസ് സുരേഷ് നേതൃത്വം നല്‍കി.