ആനക്കര: പറക്കുളത്ത് എന്‍.എസ്.എസ് എയ്ഡഡ് കോളജിന് പ്രവര്‍ത്തനാനുമതി ലഭിച്ചു. ഇംഗ്ലീഷ്, ബി.എസ്.സി ബോട്ടണി, ബി.കോം ഫിനാന്‍സ് എന്നീ മൂന്ന് കോഴ്‌സുകളില്‍ ഈ മാസം തന്നെ ക്ലാസുകള്‍ തുടങ്ങാനും സര്‍വകലാശാലയുടെ അനുമതി ലഭിച്ചു. പ്രവേശന നടപടികള്‍ ഈ മാസം തന്നെ പൂര്‍ത്തിയാക്കും.
മന്നത്ത് പത്മനാഭന്‍ വര്‍ഷങ്ങള്‍ക്കു മുന്‍പ് പറക്കുളത്ത് കോളജിനായി ശ്രമങ്ങള്‍ തുടങ്ങിയിരുന്നു. 42 ഏക്കര്‍ സ്ഥലമാണ് അദ്ദേഹം നാട്ടുകാരുടെ സഹായത്തോടെ കണ്ടെത്തിയത്. എയ്ഡഡ് കോളേജ് വേണമെന്ന എന്‍.എസ്.എസിന്റെ ആവശ്യം പരിഗണിച്ച് 2014 ലാണ് കാലിക്കറ്റ് സര്‍വകലാശാലയും അന്നത്തെ സംസ്ഥാന സര്‍ക്കാരും കോളജ് അനുവദിച്ചത്.
2016-17 അധ്യായനവര്‍ഷാരഭം മുതല്‍ കോളജിന്റെ പ്രവത്തനം തുടങ്ങുന്നതിനാവശ്യമായ നടപടികള്‍ പൂര്‍ത്തീകരിച്ചെങ്കിലും പ്രവര്‍ത്തനാനുമതി ലഭിച്ചിരുന്നില്ല.സര്‍ക്കാര്‍ നടപടിയില്‍ എന്‍.എസ്.എസ് ജന.സെക്രട്ടറി സുകുമാരന്‍ നായര്‍ നന്ദി രേഖപ്പെടുത്തി.
എന്‍.എസ്.എസിന്റെ 28ാ മത് കോളജാണ് പറക്കുളത്തേത്.കോളജിലേക്ക് ഒന്നാം വര്‍ഷ ബി.എ ഇംഗ്ലീഷ്, ബി.എസ്.സി ബോട്ടണി, ബി.കോം എന്നീ കോഴ്‌സുകളിലേക്കുള്ള അപേക്ഷാഫോം പടിഞ്ഞാറങ്ങാടി കോളജ് ഓഫിസില്‍ നിന്നും വിതരണം ചെയ്തു തുടങ്ങി. പൂരിപ്പിച്ച അപേക്ഷാ ഫോം 26 ന് വൈകിട്ട് അഞ്ചിനു മുന്‍പായി കോളജ് ഓഫിസില്‍ ലഭിക്കണം. സര്‍വകലാശാല അനുവദിച്ച ക്യാപ് ഐ.ഡി നിര്‍ബന്ധമാണെന്ന് പ്രിന്‍സിപ്പല്‍ അറിയിച്ചു. ഫോണ്‍: 9447301632.