കാസര്‍കോട്: ഇടതുമുന്നണി സര്‍ക്കാര്‍ ജാതിചിന്തയ്‌ക്കെതിരേ ഗുരുസന്ദേശം പ്രചരിപ്പിക്കുമ്പോള്‍ മദ്യത്തിന്റെ കാര്യത്തില്‍ കാണിക്കുന്നതു ഗുരുനിന്ദയാണെന്ന് കെ.പി.സി.സി പ്രസിഡന്റ് വി.എം സുധീരന്‍. കോണ്‍ഗ്രസ് ജില്ലാ കമ്മിറ്റി സംഘടിപ്പിക്കുന്ന നമുക്ക് ജാതിയില്ലെന്ന ശ്രീനാരായണ ഗുരു ആശയത്തിന്റെ ശതാബ്ദി ആഘോഷത്തില്‍ പങ്കെടുക്കാനെത്തിയതായിരുന്നു സുധീരന്‍. 'നമുക്ക് ജാതിയില്ല' എന്ന ശ്രീനാരായണ ഗുരുവിന്റെ ആശയങ്ങള്‍ പിന്തുടരുന്ന ഇടതുമുന്നണി സര്‍ക്കാര്‍ ശ്രീനാരായണ ഗുരുവിനെ ആദരിക്കാന്‍ ശ്രമം തുടങ്ങിയത് സ്വാഗതാര്‍ഹമാണ്. എന്നാല്‍ മറുഭാഗത്ത് ഗുരുവിന്റെ ആശയങ്ങള്‍ക്ക് വിരുദ്ധമായി മദ്യനയത്തെ പ്രോത്സാഹിപ്പിക്കുകയും വ്യാപകമാക്കാന്‍ ശ്രമിക്കുകയുമാണ് ചെയ്യുന്നത്. കേരളത്തിന്റെ സമസ്ത മേഖലകളിലും ഗുണകരമായിരുന്നു യു.ഡി.എഫ് സര്‍ക്കാരിന്റെ മദ്യനയം. അത് അപ്പാടെ അട്ടിമറിക്കാനാണ് ഇപ്പോള്‍ ഇടതുമുന്നണി സര്‍ക്കാര്‍ ശ്രമിക്കുന്നതെന്നും സുധീരന്‍ പറഞ്ഞു