പെരിയ: കേന്ദ്രസര്‍വകലാശാല കാംപസില്‍ നിര്‍മിച്ച ഹാള്‍ നിര്‍മാണത്തില്‍ കോടികള്‍ വെട്ടിച്ചതായി പരാതി. ഇതു സംബന്ധിച്ചു തളിപ്പറമ്പിലെ പി.കെ ജനാര്‍ദ്ദനന്‍ നായര്‍ കേന്ദ്ര മാനവ വിഭവശേഷി മന്ത്രി, ഡല്‍ഹിയിലെ സി.ബി.ഐ ചീഫ്, യൂനിവേഴ്‌സിറ്റി ഗ്രാന്‍ഡ്‌സ് കമ്മിഷണര്‍, സര്‍വകലാശാല വൈസ് ചാന്‍സലര്‍ എന്നിവര്‍ക്കു പരാതി നല്‍കി. വിവിധ ആവശ്യങ്ങള്‍ക്കു വേണ്ടി ഉപയോഗിക്കുന്നതിനു വേണ്ടിയാണ് ഇവിടെ ഹാള്‍ നിര്‍മിച്ചത്. ഈ വര്‍ഷം ഫെബ്രുവരിയിലാണ് ഇതിന്റെ ഉദ്ഘാടനം നടന്നത്. ഇരുമ്പ് തൂണുകളില്‍ മേല്‍ക്കൂര സ്ഥാപിച്ചു തയാറാക്കിയ ഹാളിനു ഏകദേശം ഒരു കോടി രൂപയാണു ചെലവു വരികയെന്നും എന്നാല്‍ മൂന്നുകോടി രൂപയാണു ചെലവ് കാണിച്ചിരിക്കുന്നതെന്നും പരാതിയില്‍ പറഞ്ഞു. ഗുണനിലവാരം കുറഞ്ഞ ഉല്‍പന്നങ്ങള്‍ ഉപയോഗിച്ച് ഹാള്‍ നിര്‍മിച്ചതായും നിര്‍മാണത്തിനുപയോഗിച്ച സിമന്റ് ഷീറ്റുകള്‍ തുടക്കം മുതല്‍ തന്നെ തകര്‍ന്നതായും പരാതിയില്‍ പറയുന്നു. ഇതു സംബന്ധമായി രണ്ടു മാസം മുമ്പു നല്‍കിയ പരാതിയില്‍ നടപടികളൊന്നും കാണാത്ത സാഹചര്യത്തിലാണ് ജനാര്‍ദ്ദനന്‍ നായര്‍ ഉന്നതങ്ങളില്‍ പരാതി നല്‍കിയത്.