കാഞ്ഞങ്ങാട്: മദ്യവില്‍പന കേസിലെ പ്രതി വീണ്ടും മദ്യവുമായി പിടിയില്‍. അട്ടേങ്ങാനം കല്ലറിലിലെ ജോളിയെ(44)യാണ് 40 പാക്കറ്റ് കര്‍ണാടക നിര്‍മിതവിദേശമദ്യവുമായി അമ്പലത്തറ പൊലിസ് അറസ്റ്റു ചെയ്‌യത്. ബാഗില്‍ നിറയെ മദ്യവുമായി കാഞ്ഞങ്ങാട് നിന്നു ബസില്‍ കയറിയ ജോളിയെ കുറിച്ച് അട്ടേങ്ങാനം കുഞ്ഞികൊച്ചിയിലെ ജാഗ്രതാ സമിതി പ്രവര്‍ത്തകരാണു പൊലിസിനു വിവരം കൈമാറിയത്. അമ്പലത്തറയില്‍ വച്ച് ബസ് പരിശോധിച്ചാണു യുവതിയില്‍ നിന്നു മദ്യമടങ്ങിയ ബാഗ് പിടിച്ചെടുത്തത്.
ഓണത്തിന് ഒരാഴ്ച മുമ്പ് ജാഗ്രതാ സമിതി നല്‍കിയ വിവരമനുസരിച്ച് യുവതിയെ അമ്പലത്തറ പൊലിസ് വിദേശമദ്യവുമായി അറസ്റ്റു ചെയ്തു കോടതിയില്‍ ഹാജരാക്കി റിമാന്‍ഡ്  ചെയ്തിരുന്നു. അടുത്ത ദിവസമാണു യുവതി ജാമ്യത്തിലിറങ്ങിയത്. വീണ്ടും മദ്യവില്‍പന തുടങ്ങിയതോടെ യുവതിയുടെ നീക്കങ്ങള്‍ ജാഗ്രതാ സമിതി പ്രവര്‍ത്തകര്‍ നിരീക്ഷിച്ചുവരികയായിരുന്നു.