പത്തനംതിട്ട: ചിറ്റാറില്‍ യന്ത്ര ഊഞ്ഞാലില്‍നിന്ന് വീണ് സഹോദരങ്ങള്‍ മരിച്ച സംഭവത്തില്‍ കോടതിയെ സമീപിക്കുമെന്ന് മാതാപിതാക്കള്‍. ഇപ്പോള്‍ നടക്കുന്ന അന്വേഷണത്തില്‍ തൃപ്തിയില്ലാത്തതിനാലാണ് കോടതിയെ സമീപിക്കുന്നത്.
ഈ മാസം എട്ടിനാണ് നാടിനെ നടുക്കിയ സംഭവം നടന്നത്. ചിറ്റാര്‍ കുളത്തിങ്കല്‍ സജി-ബിന്ദു ദമ്പതികളുടെ മകന്‍ അലന്‍ (അഞ്ച്), സഹോദരി പ്രിയങ്ക (15) എന്നിവരാണ് മരിച്ചത്. ചിറ്റാര്‍ സി.ഐയാണ് കേസ് ആദ്യം അന്വേഷിച്ചിരുന്നത്. അന്വേഷണത്തില്‍ പരാതി ഉയര്‍ന്നതിനെ തുടര്‍ന്ന് പത്തനംതിട്ട ഡി.വൈ.എസ്.പി അന്വേഷണച്ചുമതല ഏറ്റെടുത്തിരുന്നു.
ആറ് പേരാണ് കേസില്‍ പ്രതികള്‍. എന്നാല്‍, വിനോദനികുതി മാത്രം ഈടാക്കി കാര്‍ണിവല്‍ നടത്താന്‍ അനുമതി നല്‍കിയ ചിറ്റാര്‍ ഗ്രാമപഞ്ചായത്ത് അധികൃതര്‍ക്കെതിരേ യാതൊരു അന്വേഷണവും നടത്തിയിരുന്നില്ല.
ഇവരെ ഒഴിവാക്കിയാണ് എഫ്.ഐ.ആര്‍ രജിസ്റ്റര്‍ ചെയ്തത്. ഈ സാഹചര്യത്തിലാണ് മാതാപിതാക്കളും ബന്ധുക്കളും കോടതിയെ സമീപിക്കാനൊരുങ്ങുന്നത്.