പട്ടിക്കാട്: ചാക്കില്‍ കെട്ടിയ കോഴിമാലിന്യം പാതയോരത്ത് തള്ളിയ നിലയില്‍. കീഴാറ്റൂര്‍ ഒറവംപുറം കോഴിശ്ശീരികുണ്ട് ചാക്കോ റോഡിലാണ് നൂറോളം ചാക്കുകളില്‍ കെട്ടിയ കോഴിമാലിന്യം തള്ളിയിരിക്കുന്നത്. ബുധനാഴ്ച രാവിലെയാണ് പാതയരികിലെ കാടുകളില്‍ മാലിന്യം തള്ളിയതായി കണ്ടത്. രൂക്ഷമായ ദുര്‍ഗന്ധം കാരണം ഇതിലൂടെയുള്ള യാത്ര ദുസ്സഹമായിരിക്കുകയാണ്. നിരവധി വീടുകളും ഇതിനടുത്തായിട്ടുണ്ട്. മാലിന്യംതള്ളി രണ്ടുപകലുകള്‍ കഴിഞ്ഞിട്ടും സംസ്‌കരിക്കാന്‍ നടപടിയായിട്ടില്ല.
നാട്ടുകാരുടെ നേതൃത്വത്തില്‍ പൊലിസ്, പഞ്ചായത്ത്, ഹെല്‍ത്ത് വിഭാഗങ്ങള്‍ക്ക് പരാതിനല്‍കിയെങ്കിലും യാതൊരു നടപടിയും ഉണ്ടായിട്ടില്ലെന്ന് നാട്ടുകാര്‍ ആരോപിച്ചു.