കൊച്ചി: നാല് ദക്ഷിണേന്ത്യന്‍ സംസ്ഥാനങ്ങളിലെ സിനിമാ താരങ്ങള്‍ അണിനിരക്കുന്ന പ്രഥമ സെലിബ്രിറ്റി ബാഡ്മിന്റന്‍ ലീഗിന് നാളെ കൊച്ചിയില്‍ തുടക്കമാകും. എറണാകുളം കടവന്ത്ര രാജീവ് ഗാന്ധി ഇന്‍ഡോര്‍ സ്‌റ്റേഡിയത്തില്‍ രാവിലെ 9ന് നടന്‍ മമ്മൂട്ടി മല്‍സരങ്ങള്‍ ഉദ്ഘാടനം ചെയ്യും. രാവിലെ 10 മുതല്‍ വൈകിട്ട് അഞ്ചു വരെയാണ് മല്‍സരങ്ങള്‍. ദക്ഷിണേന്ത്യന്‍ സിനിമ മേഖലയില്‍ നിന്നുള്ള നാലു ടീമുകള്‍ തമ്മില്‍ ലീഗ് മല്‍സരമാണു കടവന്ത്ര ഇന്‍ഡോര്‍ സ്‌റ്റേഡിയത്തില്‍ നടക്കുന്നത്. മലയാളത്തില്‍ നിന്ന് അമ്മ കേരള റോയല്‍സ്, തമിഴില്‍ നിന്ന് ചെന്നൈ റോക്കേഴ്‌സ്, കന്നട സിനിമ മേഖലയെ പ്രതിനിധീകരിച്ച് കര്‍ണാടക ആല്‍പ്‌സ്, തെലുങ്കില്‍ നിന്നു വോളിവുഡ് തണ്ടേഴ്‌സ് എന്നീ ടീമുകളാണു ലീഗില്‍ പങ്കെടുക്കുന്നത്. ഓരോ ടീമിനും ആറു മല്‍രങ്ങളാണുണ്ടാവുക. മൂന്നു പുരുഷ ഡബിള്‍സ്, ഒരു വനിത ഡബിള്‍സ്, ഒരു മിക്‌സഡ് ഡബിള്‍സ് എന്ന രീതിയിലാണു മത്സരങ്ങള്‍. വൈകിട്ട് അഞ്ചിന് വിജയികള്‍ക്കുള്ള സമ്മാനദാനം നടക്കും.
കാണികള്‍ക്കുള്ള പ്രവേശനം സൗജന്യമാണെങ്കിലും പാസുകളിലൂടെ നിയന്ത്രണം ഏര്‍പ്പെടുത്തിയിട്ടുണ്ട്.