മുക്കം: ബിവറേജസ് കോര്‍പ്പറേഷന്റെ തിരുവമ്പാടി ഔട്ട്‌ലെറ്റില്‍ മോഷണം നടന്നു. ബുധനാഴ്ച രാത്രിയിലാണ് മോഷണം നടന്നത്. ഷട്ടറിന്റെ പൂട്ടുപൊളിച്ച് മോഷ്ടാക്കള്‍ അകത്തുകടന്നങ്കിലും മൂന്നു കുപ്പി ബ്രാണ്ടി മാത്രമാണ് നഷ്ടമായതന്ന് ജീവനക്കാര്‍ പറഞ്ഞു. അതേസമയം, 20 ലക്ഷത്തോളം രൂപയും നിരവധി മദ്യക്കുപ്പികളും ഔട്ട്‌ലെറ്റില്‍ ഉണ്ടായിരുന്നു. എന്നാല്‍ ഇതൊന്നും മോഷണം പോകാത്തതില്‍ ദുരൂഹതയുണ്ടെന്ന് പറയപ്പെടുന്നു.
ബിവറേജസ് കോര്‍പ്പറേഷനില്‍ ദിനേന വരുന്നവരോ സ്ഥലത്തെ കുറിച്ച് അടുത്തറിയാവുന്നവരോ ആയിരിക്കും സംഭവത്തിനു പിന്നിലെന്നാണ് പൊലിസ് സംശയിക്കുന്നത്. മൂന്നാംതവണയാണ് തിരുവമ്പാടി ബിവറേജസ് ഔട്ട്‌ലെറ്റില്‍ മോഷണം നടക്കുന്നത്. ഒഴിഞ്ഞ സ്ഥലത്തായതിനാല്‍ ആരുടെയും ശ്രദ്ധയില്‍പെടില്ലെന്നതും സെക്യൂരിറ്റി ജീവനക്കാരോ സി.സി.ടി.വി കാമറയോ ഇല്ലാത്തതും മോഷ്ടാക്കള്‍ക്ക് തുണയാവുകയാണ്. തുടര്‍ച്ചയായി നടക്കുന്ന മോഷണങ്ങളുടെ പശ്ചാത്തലത്തില്‍ പൊലിസ് നിരീക്ഷണം ശക്തമാക്കിയിട്ടുണ്ട്.