തളിപ്പറമ്പ്: ദേശീയപാതയില്‍ പരിയാരം നന്‍മഠം ക്ഷേത്രത്തിനു സമീപം തോട്ടിലേക്ക് ലോറി മറിഞ്ഞ് ഒന്‍പത് പോത്തുകള്‍ ചത്ത സംഭവത്തില്‍ ഉടമസ്ഥനെ പരിയാരം പൊലിസ് അറസ്റ്റ് ചെയ്തു. കാഞ്ഞങ്ങാട് പടന്നക്കാട്ടെ ഒഴിഞ്ഞവളപ്പില്‍ ഇ അഷറഫ്(38) ആണ് അറസ്റ്റിലായത്. ഇയാള്‍ക്കെതിരേ അപകടം നടന്ന ദിവസം തന്നെ എസ്.പി.സി.എ ആക്ടുകള്‍ പ്രകാരം കേസെടുത്തിരുന്നു.
മൃഗങ്ങളെ അനുമതിയില്ലാതെ വാഹനത്തില്‍ കുത്തിനിറച്ച് കൊണ്ടുവന്നതിനും പീഡിപ്പിച്ചതിനുമാണ് അറസ്റ്റ്. അപകടത്തില്‍ ചത്ത പോത്തുകളെ മറ്റൊരു ലോറിയില്‍ കയറ്റി ഒറ്റപ്പാലത്തേക്കു തിരിച്ചുകൊണ്ടു പോകുകയായിരുന്നു. ഇതറിഞ്ഞ പരിയാരം പൊലിസ് ഒറ്റപ്പാലം പൊലിസുമായി ബന്ധപ്പെട്ട് വെറ്ററിനറി സര്‍ജനെ കൊണ്ട് പോസ്റ്റ്‌മോര്‍ട്ടം നടത്തിച്ച് കുഴിച്ചു മൂടി.
അപകടത്തില്‍ മൃഗക്ഷേമ സംഘടനയായ ആനിമല്‍ ആന്റ് ബേഡ്‌സ് വെല്‍ഫേര്‍ ട്രസ്റ്റ് നല്‍കിയ പരാതിയെ തുടര്‍ന്നാണ് പൊലിസ് നടപടി. അറസ്റ്റിലായ അഷ്‌റഫിനെ പിന്നീട് ജാമ്യത്തില്‍ വിട്ടു.