ഹൈദരാബാദ് യൂനിവേഴ്‌സിറ്റിയുടെ സ്‌കൂള്‍ ഓഫ് മാനേജ്‌മെന്റ് സ്റ്റഡീസില്‍ എം.ബി.എക്ക് അപേക്ഷ ക്ഷണിച്ചു. 2017-18 അധ്യയന വര്‍ഷത്തെ കോഴ്‌സിലേക്കാണ് പ്രവേശനം. ആകെ 60 സീറ്റുകളാണ് ഉള്ളത്. ആദ്യ രണ്ടു സെമസ്റ്ററുകളിലെ ഫൗണ്ടേഷന്‍ കോഴ്‌സുകള്‍ക്കുശേഷം രണ്ടാം വര്‍ഷം ഏതെങ്കിലും രണ്ടു വിഭാഗത്തില്‍ സ്‌പെഷലൈസ് ചെയ്യാം. ഏതെങ്കിലും വിഷയത്തില്‍ 60 ശതമാനം മാര്‍ക്കോടെ ബിരുദമുള്ളവര്‍ക്ക് അപേക്ഷിക്കാം. 2017 ജൂണില്‍ ബിരുദം പൂര്‍ത്തിയാക്കുന്നവര്‍ക്കും അപേക്ഷിക്കാവുന്നതാണ്.
ഡിസംബര്‍ 14നു നടക്കുന്ന കാറ്റ് 2016ന് അപേക്ഷിച്ചവര്‍ക്കാണ് അവസരം. കാറ്റ് 2016ല്‍ നേടുന്ന സ്‌കോര്‍ അനുസരിച്ചായിരിക്കും പ്രാഥമിക തെരഞ്ഞെടുപ്പ്. 2017 ഫെബ്രുവരിയില്‍ നടക്കുന്ന ഗ്രൂപ് ചര്‍ച്ച, അഭിമുഖം എന്നിവയുടെ അടിസ്ഥാനത്തിലായിരിക്കും പ്രവേശനം. ഹൈദരാബാദ് കാംപസില്‍ അഭിമുഖവും നടക്കും. അഡ്മിഷന്‍ മാര്‍ച്ചോടെ പൂര്‍ത്തിയാക്കി ജൂലൈയില്‍ ക്ലാസുകള്‍ ആരംഭിക്കും.
acad.uohyd.ac.in എന്ന വെബ്‌സൈറ്റ് വഴി ഓണ്‍ലൈനായാണ് അപേക്ഷ സമര്‍പ്പിക്കേണ്ടത്. ജനറല്‍ വിഭാഗത്തിലുള്ളവര്‍ക്ക് 350 രൂപയും ഒ.ബി.സിക്ക് 250 രൂപയും എസ്.സി, എസ്.ടി, ഭിന്നശേഷി വിഭാഗത്തിനു 150 രൂപയുമാണ് അപേക്ഷാഫീസ്. എസ്.ബി.ഐ ഓണ്‍ലൈന്‍ വഴി ഫീസടച്ച് രജിസ്റ്റര്‍ ചെയ്യണം. ഡിസംബര്‍ 20 മുതലാണ് അപേക്ഷിക്കേണ്ട ലിങ്ക് ലഭിക്കുക. വിശദ വിവരങ്ങള്‍ക്ക് വെബ്‌സൈറ്റ് സന്ദര്‍ശിക്കുക.