തളിപ്പറമ്പ്: മംഗലശ്ശേരി നവോദയ ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബും ഡി.ടി.പി.സിയും സംയുക്തമായി നാളെ സംഘടിപ്പിക്കുന്ന നാലാമത് മലബാര്‍ ജലമേളക്ക് മംഗലശ്ശേരി പുഴ ഒരുങ്ങി. 25-15 പേര്‍ തുഴയുന്ന ചുരുളന്‍ വള്ളങ്ങളുടെ മത്സരങ്ങളില്‍ 12 ടീമുകള്‍ വീതം മത്സരിക്കും. നെഹ്രുട്രോഫി വളളംകളി മത്സരങ്ങളില്‍ പങ്കെടുത്ത ടീമുകള്‍ ഉള്‍പ്പെടെ മത്സരത്തിനെത്തും. തൃക്കരിപ്പൂര്‍ മൊട്ടമ്മല്‍ ബ്രദേഴ്‌സ് നടത്തിയ ജലോത്സവത്തില്‍ എ.പി.ജെ അബ്ദുല്‍കലാം സ്വര്‍ണക്കപ്പ് നേടിയ ആത്മവിശ്വാസത്തില്‍ മംഗലശ്ശേരിയുടെ സ്വന്തം ടീമും മത്സരിക്കാനുണ്ട് എന്നതാണ് ഇത്തവണത്തെ പ്രത്യേകത. നാളെ ഒരുമണിക്ക് മന്ത്രി കടന്നപ്പള്ളി രാമചന്ദ്രന്‍ ജലമേള ഉദ്ഘാടനം ചെയ്യും. ടി.വി രാജേഷ് എം.എല്‍.എ അധ്യക്ഷനാകും. സിനിമാതാരം മനോജ് കെ ജയന്‍ മുഖ്യാതിഥിയാകും. പരിപാടിയുടെ ഭാഗമായി നിശ്ചല ദൃശ്യങ്ങളുടെ മത്സരം, ജലഘോഷയാത്ര, ജലസാഹസിക പ്രകടനങ്ങള്‍, കയാക്കിങ്, റോവിങ്, ഗാനമേള എന്നിവയും അരങ്ങേറും.