മുളങ്കുന്നത്തുകാവ്: പൊതുവിദ്യാലയങ്ങളെ മികവിന്റെ കേന്ദ്രങ്ങളാക്കാന്‍ പല വിധത്തിലുള്ള ഏകോപനം ആവശ്യമാണെന്നു കൃഷിവകുപ്പു മന്ത്രി വി.എസ് സുനില്‍കുമാര്‍ പറഞ്ഞു. പുതുതായി നിയമനം ലഭിച്ച ഗവണ്‍മെന്റ് ഹൈസ്‌കൂള്‍ പ്രഥമാധ്യാപകര്‍ക്കു സീമാറ്റ് കിലയില്‍ സംഘടിപ്പിച്ച ദ്വിദിന പരിശീലനപരിപാടിയില്‍ പങ്കെടുത്തു സംസാരിക്കുകയായിരുന്നു അദ്ദേഹം. സമൂഹത്തോടുള്ള ഉത്തരവാദിത്വം നിറവേറ്റാന്‍ അധ്യാപകര്‍ തയാറാകണമെന്നും മന്ത്രി നിര്‍ദേശിച്ചു. സീമാറ്റ് ഡയറക്ടര്‍ ഡോ.പി.എ ഫാത്തിമ, കണ്‍സല്‍ട്ടന്റ് ഡോ.എം.ജി രമാദേവി, കില ഡയറക്ടര്‍ ഡോ.പി.പി ബാലന്‍ തുടങ്ങിയവര്‍ സംബന്ധിച്ചു. വിദ്യാഭ്യാസനിയമം, ഓഫിസ് മാനേജ്‌മെന്റ്, കുട്ടികളുടെ അവകാശങ്ങള്‍ തുടങ്ങിയ വിഷയങ്ങളിലായിരുന്നു പരിശീലനം.