കോടഞ്ചേരി: യുവാവിനെ ഭാര്യവീട്ടില്‍ നിന്ന് ഷോക്കേറ്റ നിലയില്‍ ആശുപത്രിയിലെത്തിച്ച സംഭവം കൊലപാതകമാണെന്ന് പൊലിസ്. മൈലള്ളാംപാറ മുണ്ടക്കല്‍ ജിഷോ വര്‍ക്കി (36) ആണ് കഴിഞ്ഞ ദിവസം മരണപ്പെട്ടത്. സംഭവത്തെ തുടര്‍ന്ന് ഭാര്യാപിതാവ് കണ്ടത്തില്‍ ജോസ് (60)നെ കോടഞ്ചേരി പൊലിസ് കസ്റ്റഡിയിലെടുത്തു. വ്യാഴാഴ്ച രാത്രി 12 മണിയോടെയാണ് സംഭവം. ഷോക്കേറ്റ് പരുക്കേറ്റ രീതിയില്‍ ഭാര്യ വീട്ടുകാര്‍ ചേര്‍ന്ന് ജിഷോയെ കോടഞ്ചേരിയിലെ സ്വകാര്യ ആശുപത്രിയില്‍ പ്രവേശിപ്പിക്കുകയും പിന്നീട് മരണപ്പെടുകയുമായിരുന്നു. തുടര്‍ന്ന് കോഴിക്കോട് മെഡിക്കല്‍ കോളജ് ആശുപത്രി മോര്‍ച്ചറിയിലേക്ക് മാറ്റി. വെള്ളിയാഴ്ച പോസ്റ്റ്‌മോര്‍ട്ടം നടത്തിയപ്പോഴാണ് ശ്വാസം മുട്ടിയാണ് മരണം സംഭവിച്ചതെന്ന് സ്ഥിരീകരിച്ചത്. മരണപ്പെട്ട ജിഷോ മുണ്ടക്കല്‍ വര്‍ക്കി-അന്നമ്മ ദമ്പതികളുടെ മകനാണ്. ഭാര്യ-ഷീന. മക്കള്‍-ജിത്തുമോന്‍, ജീന മരിയ. സഹോദരങ്ങള്‍- സാന്റോ (ആര്‍മി, സിക്കിം), ജിന്റോ (സൗദി), ജിജോ, എല്‍സമ്മ, ബിജി.