കോട്ടയം: കാണാന്‍ കഴിയില്ലെങ്കിലും പ്രിയതാരത്തെ തൊട്ടറിഞ്ഞതിന്റെ സന്തോഷത്തിലാണ് ഒളശസര്‍ക്കാര്‍ അന്ധവിദ്യാലയത്തിലെ വിദ്യാര്‍ഥികള്‍. സിനിമാ താരം കുഞ്ചാക്കോ ബോബന്‍ ഇന്നലെ  അന്ധവിദ്യാലയത്തില്‍ അതിഥിയായെത്തിയപ്പോഴാണ് സന്തോഷകരമായ നിമിഷങ്ങളുണ്ടായത്.  കഴിഞ്ഞദിവസം സ്‌കൂള്‍ അധികൃതരെ വിളിച്ച് താന്‍ സ്‌കൂളിലെ വിദ്യാര്‍ഥികളെ കാണാന്‍ വരുന്നുണ്ടെന്ന കാര്യം കുഞ്ചാക്കോ ബോബന്‍  അറിയിച്ചിരുന്നു.
ഇന്നലെ ഉച്ചയ്ക്ക് 1.30നു അന്ധവിദ്യാലയത്തിലെത്തിയ താരം  ഹെഡ്മാസ്റ്റര്‍ ഇ.ജെ കുര്യന്‍ പൂച്ചെണ്ട് നല്‍കി സ്വീകരിച്ചു. തുടര്‍ന്നു വിദ്യാര്‍ഥികളുമായി സിനിമ വിശേഷങ്ങള്‍ പങ്കുവച്ചു. ഉള്‍ക്കാഴ്ച കൊണ്ട് തന്റെ സിനിമയെ കണ്ടവരാണ് സ്‌കൂളിലെ വിദ്യാര്‍ഥികളെന്നും അവരെ കാണാനും അവരോടൊപ്പം ചെലവഴിക്കാനും സാധിച്ചത് ജീവിതത്തിലെ സുവര്‍ണനിമിഷങ്ങളില്‍ ഒന്നാണെന്നും അദ്ദേഹം പറഞ്ഞു. നമ്മള്‍ ആരാകണമെന്നാഗ്രഹിക്കുന്നുവോ ആ ആഗ്രഹം തീവ്രമാണെങ്കില്‍ ഈ ലോകം മുഴുവന്‍ നമ്മുടെ കൂടെയുണ്ടാകും എന്ന അല്‍കെമിസ്റ്റ്  എന്ന നോവലിലെ  പൗലോ കോയ്‌ലോയുടെ വരികള്‍ കുഞ്ചാക്കോ ബോബന്‍ ഉദ്ദരിച്ചു.
തുടര്‍ന്ന് വിദ്യാര്‍ഥികളോടൊപ്പമിരുന്നു ഭക്ഷണം കഴിച്ച അദ്ദേഹം സെല്‍ഫിയെടുക്കാനും വിദ്യാര്‍ഥികളുടെ വിശേഷങ്ങള്‍ ചോദിച്ചറിയാനും സമയം കണ്ടെത്തി.