ആലപ്പുഴ: ബി.ജെപി ബന്ധത്തെച്ചൊല്ലി ബി.ഡി.ജെ.എസ് നേതാക്കള്‍ രണ്ടു തട്ടില്‍. ബി.ഡി.ജെ.എസിന് ബി.ജെ.പിയുമായി അഭിപ്രായ വ്യത്യാസമില്ലെന്ന് തുഷാര്‍ വെള്ളാപ്പള്ളി പറഞ്ഞു. വെള്ളാപ്പള്ളി നടേശന്‍ പറഞ്ഞത് എസ്.എന്‍.ഡി.പിയുടെ നിലപാടാണെന്നും ബി.ജെ.പിയുമായുള്ള ബന്ധത്തില്‍ വിള്ളല്‍ ഇല്ലെന്നും അദ്ദേഹം മാധ്യമ പ്രവര്‍ത്തകരോട് പറഞ്ഞു. അതേസമയം ബി.ഡി.ജെ.എസിനും ബി.ജെ.പിയും തമ്മില്‍ നഷ്ടക്കച്ചവടമാണെന്ന് വെള്ളാപ്പള്ളി നടേശന്‍ ഇന്നും ആവര്‍ത്തിച്ചു. ഇതോടെ ബി.ജെപി ബന്ധത്തെച്ചൊല്ലി ബി.ഡി.ജെ.എസ് നേതാക്കളുടെ അഭിപ്രായ വ്യത്യാസം മറ നീക്കി പുറത്തുവന്നിരിക്കുകയാണ്. സ്ഥാനമാനങ്ങള്‍ സംബന്ധിച്ച് ഇന്ന് ഉച്ചയ്ക്ക് ശേഷം ചേര്‍ത്തലയില്‍ വച്ച് ബി.ഡി.ജെ.എസിന്റെ യോഗം നടക്കുന്നുണ്ട്. കഴിഞ്ഞ ദിവസവും വെള്ളാപ്പള്ളി നടേശന്‍ ഇതേ നിലപാടുമായി രംഗത്തുവന്നിരിന്നു.