കോഴിക്കോട്: കോടഞ്ചേരിയില്‍ യുവാവിനെ മരിച്ചനിലയില്‍ കണ്ടെത്തിയ സംഭവം കൊലപാതകമാണെന്ന് തെളിഞ്ഞു. മൈലള്ളാംപാറ മുണ്ടക്കല്‍ ജിഷോ വര്‍ക്കി(36)യാണ് കൊല്ലപ്പെട്ടത്. ജിഷോയെ ശ്വാസം മുട്ടിച്ചുകൊന്ന്  ഷോക്കേറ്റുമരിച്ചതാണെന്ന് വരുത്തി തീര്‍ക്കുകയായിരുന്നുവെന്ന് പൊലിസ് അന്വേഷണത്തില്‍ വ്യക്തമായി.
സംഭവവുമായി ബന്ധപ്പെട്ട്  ജിഷോയുടെ ഭാര്യ  ഷീന, പിതാവ്  കണ്ണോത്ത് ചുരമുണ്ടകണ്ടത്തില്‍ ജോസ്(60) എന്നിവരെ പൊലിസ് അറസ്റ്റ് ചെയ്തു. ജിഷോ സ്ഥിരമായി വീട്ടില്‍  മദ്യപിച്ചായിരുന്നു എത്തിയിരുന്നത്. ഇതാണ് കൊലപാതകത്തിലേക്ക് നയിച്ചത്.  ഇഷ്ട ഭക്ഷണം ഉണ്ടെന്ന് പറഞ്ഞ് വീട്ടിലെ അടുക്കളയിലേക്ക് ഭാര്യാപിതാവ് വിളിച്ചുവരുത്തിയശേഷം കഴുത്തുഞെരിച്ച് കൊലപ്പെടുത്തുകയായിരുന്നുവെന്ന് പൊലിസ്  ചോദ്യം ചെയ്തതില്‍ നിന്നും വ്യക്തമായി.
 ജിഷോയുടെ മൃതദേഹം മുറിയിലെ കട്ടിലില്‍ കിടത്തിയശേഷം  സ്വിച്ച് ബോര്‍ഡുകളും മറ്റും തകര്‍ത്ത് ഷോക്കേറ്റതെന്ന പ്രതീതി ജനിപ്പിക്കുകയായിരുന്നു പ്രതികളെന്ന് പൊലിസ് പറഞ്ഞു.  ഇന്നലെ പോസ്റ്റ് മോര്‍ട്ടം നടത്തിയപ്പോഴാണ് സംഭവത്തിന്റെ ചുരുളഴിഞ്ഞത്.