കോഴിക്കോട്: ഇടിയങ്ങര ശൈഖ് പള്ളിയിലെ 457ാം അപ്പവാണിഭ നേര്‍ച്ചയുടെ പ്രധാന ചടങ്ങുകള്‍ ഇന്ന് സമാപിക്കും. അഭൂതപൂര്‍വ്വമായ തിരക്കാണ് ഇന്നലെ മഖാമില്‍ അനുഭവപ്പെട്ടത്. ഇന്ന് രാവിലെ 11ന് നടക്കുന്ന ഖത്തം ദുആയില്‍ ആയിരങ്ങള്‍ പങ്കെടുക്കും. കേരളത്തിലെ പ്രശസ്തരായ പണ്ഡിതന്മാരുടെയും സാദാത്തുക്കളുടെയും സാന്നിധ്യത്തില്‍ നടക്കുന്ന ഖത്തം ദുആക്ക് അത്തിപ്പറ്റ മൊയ്തീന്‍ കുട്ടി മുസ്‌ലിയാര്‍ നേതൃത്വം നല്‍കും. ഉച്ചക്ക് അന്നദാനവും നടക്കും. ഖത്തം ദുആയോടെ നേര്‍ച്ചയുടെ പ്രധാന ചടങ്ങുകള്‍ സമാപിക്കുമെങ്കിലും ഏതാനും ദിവസങ്ങള്‍ കൂടി സിയാറത്തും നിസ്‌കാരാനന്തരമുള്ള മഖാമിലെ പ്രാര്‍ത്ഥനയും തുടരും.