കാട്ടിക്കുളം: വീടിന് മുകളില്‍ തെങ്ങ് വീണ് അടുക്കള തകര്‍ന്നു. കഴിഞ്ഞ ദിവസം രാത്രി 10ഓടെ വീടിന് സമീപത്തെ തെങ്ങ് വീടിന് മുകളില്‍ കടപുഴകി വീഴുകയായിരുന്നു. അരണപ്പാറ കോഴിക്കുന്നത്ത് കെ.ബി ഇബ്‌റാഹീം സഫിയ ദമ്പതികളുടെ വീട് ഭാഗീകമായി തകര്‍ന്നത്. വീട്ടുകാര്‍ ഭക്ഷണം കഴിച്ച് റൂമിലേക്ക് കയറിയ സമയത്തായിരുന്നു പെട്ടന്നുള്ള മഴയിലും കാറ്റിലും തെങ്ങ് വീണത്. അടുക്കളയുടെ ഒരു ഭാഗം പൂര്‍ണമായും തകര്‍ന്നിട്ടുണ്ട്. കഴുക്കോലും മുഴുവന്‍ ഷീറ്റുകളും പൊട്ടിയ നിലയിലാണ്. തലനാരിഴക്കാണ് ദമ്പതികള്‍ രക്ഷപ്പെട്ടത്. ഒരു ലക്ഷം രൂപയുടെ നഷ്ടം സംഭവിച്ചതായി കെ.ബി ഇബ്‌റാഹീം പറഞ്ഞു. മൂന്ന് ദിവസമായി ഈ ഭാഗങ്ങളില്‍ ശക്തമായ കാറ്റും മഴയും വ്യാപകമാണ്. തെങ്ങ് വീണതില്‍ അടുക്കളക്ക് സമീപമുള്ള കക്കൂസ് പൂര്‍ണമായും തകര്‍ന്നിട്ടുണ്ട്. തിരുനെല്ലി വില്ലേജ് അധികൃതരെത്തി നാശനഷ്ടങ്ങല്‍ വിലയിരുത്തി.