തളിപ്പറമ്പ് : കണ്ണപ്പിലാവില്‍ കാറും ബൈക്കും കൂട്ടിയിടിച്ചുണ്ടായ അപകടത്തില്‍ രണ്ടു പേര്‍ക്ക് പരുക്കേറ്റു. ഇന്നലെ രാവിലെ ആറോടെ കുറുമാത്തൂര്‍ സര്‍വിസ് സഹകരണ ബാങ്കിന്റെ കണ്ണപ്പിലാവ് ബ്രാഞ്ചിനുമുന്നിലാണ് അപകടമുണ്ടായത്. പരുക്കേറ്റ ബൈക്ക് യാത്രക്കാരായ ബാവുപ്പറമ്പിലെ കിഴക്കേപ്പുരയില്‍ രമില്‍(44), എ.ആര്‍ ക്യാംപിലെ പൊലിസുകാരന്‍ ചുഴലി പടിഞ്ഞാറെപ്പുരയില്‍ ശിവദാസന്‍(29) എന്നിവരെ പരിയാരം മെഡിക്കല്‍ കോളജിലും പിന്നീട് മംഗലാപുരം സ്വകാര്യ ആശുപത്രിയിലും പ്രവേശിപ്പിച്ചു.
കാര്‍ ഡ്രൈവര്‍ ഉറങ്ങിപ്പോയതാണ് അപകട കാരണമായി പറയുന്നത്. കോഴിക്കോട് എയര്‍പോര്‍ട്ടില്‍ നിന്നു വരികയായിരുന്ന കാര്‍ ബൈക്കിനെ ഇടിച്ചുതെറിപ്പിക്കുകയായിരുന്നു.