കോട്ടയം: ശ്രീനാരായണഗുരുവിന്റെ 'നമുക്ക് ജാതിയില്ല' വിളംബരത്തിന്റെ ശതാബ്ദി ആഘോഷം ജില്ലയില്‍ വിപുലമായി സംഘടിപ്പിക്കുന്നതിന്  മന്ത്രി പി. തിലോത്തമന്റെ നേതൃത്വത്തില്‍ സ്വാഗത സംഘം രൂപീകരിച്ചു. ജില്ലാ പഞ്ചായത്ത് പ്രസിഡന്റ് ജോഷി ഫിലിപ്പ് സ്വാഗത സംഘത്തിന്റെ അധ്യക്ഷനും മന്ത്രി പി. തിലോത്തമന്‍, മുന്‍ മുഖ്യമന്ത്രി ഉമ്മന്‍ചാണ്ടി, ജില്ലയില്‍ നിന്നുളള എം.പി മാര്‍, എം.എല്‍.എമാര്‍, കലക്ടര്‍ സി.എ ലത തുടങ്ങിയവര്‍ രക്ഷാധികാരികളുമാണ്.
എം.ജി സര്‍വകലാശാല വൈസ് ചാന്‍സലര്‍ ബാബു സെബാസ്റ്റ്യന്‍, ജില്ലാ പഞ്ചായത്ത് വൈസ് പ്രസിഡന്റ് മേരി സെബാസ്റ്റ്യന്‍, മുനിസിപ്പല്‍ ചെയര്‍പേഴ്‌സണ്‍ ഡോ. പി. ആര്‍ സോന, എ.ഡി.എം പി അജന്തകുമാരി, ഗ്രന്ഥശാല സംഘം ജില്ല പ്രസിഡന്റ് വി.കെ കരുണാകരന്‍, ഐ.ആന്റ് പി.ആര്‍.ഡി മേഖലാ ഡെപ്യൂട്ടി ഡയറക്ടര്‍ കെ അബ്ദുള്‍ റഷീദ് എന്നിവര്‍ ഉപാധ്യക്ഷന്‍മാരാണ്. ഗ്രന്ഥശാലാ സംഘം ജില്ലാ സെക്രട്ടറി കെ.ആര്‍ ചന്ദ്രമോഹനാണ് സമിതിയുടെ ജനറല്‍ കണ്‍വീനര്‍.
ജില്ലയിലെ മുനിസിപ്പല്‍ ചെയര്‍മാന്‍മാര്‍, ബ്ലോക്ക്-പഞ്ചായത്ത് പ്രസിഡന്റുമാര്‍, വിവിധ വകുപ്പുതല ഉദ്യോഗസ്ഥര്‍, രാഷ്ട്രീയ കക്ഷി പ്രതിനിധികള്‍, പ്രസ് ക്ലബ് പ്രസിഡന്റ്, സര്‍വീസ്- സംഘടന, യുവജന സംഘടനാ പ്രതിനിധികള്‍, മുതിര്‍ന്ന സാംസ്‌ക്കാരിക പ്രവര്‍ത്തകര്‍ തുടങ്ങിയവരാണ് അംഗങ്ങള്‍. പരിപാടിയുടെ ജില്ലാതല ഉദ്ഘാടനം വൈക്കത്ത് നടക്കും. സെമിനാറുകള്‍, പ്രഭാഷണങ്ങള്‍, സ്‌കൂള്‍-കോളേജ്  വിദ്യാര്‍ത്ഥികള്‍ക്കുളള വിവിധ മത്സരങ്ങള്‍ തുടങ്ങിയവ ഇതിന്റെ ഭാഗമായി നടത്തും. ചലച്ചിത്ര അക്കാദമിയുടെ ആഭിമുഖ്യത്തില്‍ സംസ്‌ക്കാരിക പരിപാടികളും സംഘടിപ്പിക്കും.