കഠിനംകുളം: തുമ്പ പള്ളിത്തുറ ജങ്ഷനില്‍ തീരദേശ വികസന കോര്‍പ്പറേഷന്റെ ഫണ്ടുപയോഗിച്ചു സ്ഥാപിച്ചിരുന്ന ഹൈമാസ്റ്റ് ലൈറ്റിന്റെ പന്ത്രണ്ട് ബാറ്ററികള്‍ മോഷ്ടിച്ച രണ്ടംഗ സംഘത്തിലെ പ്രധാനി പൊലിസ് പിടിയില്‍.
നേമം, കാരയ്ക്കാമണ്ഡപം സ്വദേശി നവാസ് (43) നെയാണ് കഴക്കൂട്ടം പൊലിസ് അറസ്റ്റുചെയ്തത്. ഹൈമാസ്റ്റ് ലൈറ്റ്  പ്രവര്‍ത്തിക്കുന്നതിന് വേണ്ടി പള്ളിത്തുറ ഹയര്‍ സെക്കന്‍ഡറിസ്‌കൂള്‍ കോമ്പൗണ്ടില്‍ സൂക്ഷിച്ചിരുന്ന രണ്ടുലക്ഷം രൂപ വില വരുന്ന പന്ത്രണ്ടോളം ബാറ്ററികളാണ് ഏതാനം ദിവസം മുന്‍പ് മോഷണം പോയത്. ഈ വിവരം സ്‌കൂള്‍ അധികൃതരുടെ ശ്രദ്ധയില്‍ പെട്ടതിനെ തുടര്‍ന്ന് പൊലിസില്‍ പരാതി നല്‍കിയിരുന്നു. തുടര്‍ന്ന് സ്‌കൂളില്‍ സ്ഥാപിച്ചിരുന്ന സി.സി.ടി.വി കാമറയില്‍ പതിഞ്ഞ ചിത്രങ്ങള്‍ പരിശോധിക്കുകയും അന്വേഷണം ആരംഭിക്കുകയും ചെയ്തു. ഇതിനിടെയാണ് പ്രധാന പ്രതിയായ നവാസിനെയും മോഷ്ടിച്ച തൊണ്ടിമുതലായ പന്ത്രണ്ടു ബാറ്ററികളും പിടികൂടിയത്.
പ്രതിയും കൂട്ടാളികളും കാറില്‍ വന്നതിനു ശേഷം ബാറ്ററി മോഷണം നടത്തി തിരിച്ചുപോയതായി പൊലിസിനോടു സമ്മതിച്ചിട്ടുണ്ട്. ജില്ലയ്ക്കകത്തും പുറത്തുമുള്ള സമാനമായ മോഷണങ്ങളില്‍ ഇവര്‍ക്ക് പങ്കുണ്ടോയെന്നും പരിശോധിച്ചു വരുന്നുണ്ട്. അറസ്റ്റിലായ നവാസ് ജില്ലയ്ക്കകത്തും പുറത്തും നിരവധി മോഷണ പിടിച്ചുപറിച്ച കേസില്‍ പ്രതിയാണെന്നും കൂട്ട് പ്രതിക്കായി അന്വേഷണം ആരംഭിച്ചതായും പൊലിസ് പറഞ്ഞു.
വര്‍ക്കല സ്വദേശിയായ യുവാവാണ് കൂട്ട് പ്രതിയെന്നാണ് പൊലിസ് പറയുന്നത്. കഴക്കൂട്ടം അസി.കമ്മിഷണര്‍ പ്രമോദ്കുമാറിന്റെ നേതൃത്വത്തില്‍ ടെക്‌നോപാര്‍ക്ക് കഴക്കൂട്ടം സര്‍ക്കിള്‍ ഇന്‍സ്‌പെക്ടര്‍ സി. അജയ്കുമാര്‍ തുമ്പ, എസ്.ഐ ധനപാല്‍ നേതൃത്വത്തിലാണ് പ്രതിയെ പിടികൂടിയത്.