കൊച്ചി: സിക വൈറസ് രോഗം ഉള്‍പ്പെടെയുള്ള കൊതുക് ജന്യ രോഗങ്ങളെ പ്രതിരോധിക്കുന്നതിന് സംഘടിപ്പിച്ച ഊര്‍ജിത കൊതുക്  കൂത്താടി നശീകരണ യജ്ഞത്തിന്റെ ജില്ലാതല ഉദ്ഘാടനം  കാക്കനാട് പ്രാഥമികാരോഗ്യ കേന്ദ്രത്തില്‍ ജില്ലാ പഞ്ചായത്ത് വൈസ് പ്രസിഡന്റ് അഡ്വ. ബി.എ അബ്ദുള്‍ മുത്തലിബ് നിര്‍വഹിച്ചു.
സിക പോലുള്ള പുതിയ പുതിയ രോഗങ്ങളെ നേരിടാന്‍ ജനങ്ങള്‍  സദാ ജാഗരൂഗരായിരിക്കണമെന്ന് അബ്ദുള്‍ മുത്തലിബ് പറഞ്ഞു.
അന്താരാഷ്ട്ര വിമാനത്താവളത്തിന്റെ സാന്നിധ്യവും, വിവിധ രാജ്യങ്ങളില്‍ നിന്നും അനുദിനം എത്തുന്ന യാത്രക്കാരുടെ ബാഹുല്യവും കണക്കിലെടുക്കുമ്പോള്‍ എറണാകുളം ജില്ലയില്‍ ഇത്തരം രോഗങ്ങളെ പ്രതിരോധിക്കുവാനുള്ള കൂട്ടായ ശ്രമങ്ങള്‍ ഉണ്ടാകണമെന്നും അദ്ദേഹം ചൂണ്ടിക്കാട്ടി. തൃക്കാക്കര നഗരസഭ ചെയര്‍ പഴ്‌സണ്‍ കെ.കെ നീനു അധ്യക്ഷത വഹിച്ചു.
ബോധവത്കരണ സന്ദേശങ്ങള്‍ അടങ്ങിയ ലഘുലേഖകള്‍  ആരോഗ്യകാര്യ സ്ഥിരം സമിതി അധ്യക്ഷ ഷബ്‌ന മെഹറലിക്ക്  കൈമാറി. ജില്ലാ മെഡിക്കല്‍ ഓഫിസര്‍ ഡോ. എന്‍.കെ. കുട്ടപ്പന്‍, അഡിഷണല്‍ ഡി.എം.ഒ  ഡോ. ബാലഗംഗാധരന്‍, വാര്‍ഡ് കൗണ്‍സിലര്‍ സ്മിത സണ്ണി, ജൂനിയര്‍ അഡ്മിനിസ്‌ട്രേറ്റീവ് മെഡിക്കല്‍ ഓഫീസര്‍ ഡോ. ജിതേഷ്, ഡോ. മായാ പ്രഭു എന്നിവര്‍ പ്രസംഗിച്ചു.