റിയാദ്: യമനില്‍ അമേരിക്ക നടത്തിയ ഡ്രോണ്‍ ആക്രമണത്തില്‍ മൂന്നു അല്‍ ഖാഇദ പ്രവര്‍ത്തകരെന്നു സംശയിക്കുന്നവരെ കൊലപ്പെടുത്തിയതായി സുരക്ഷാ അധികൃതര്‍ വെളിപ്പെടുത്തി.

കിഴക്കന്‍ യമനിലേക്ക് കാറില്‍ യാത്ര ചെയ്യുന്നതിനിടെയാണ് ഇവരെ ആക്രമിച്ചത്. വെള്ളിയാഴ്ച മരിബ് പ്രവിശ്യയിലേക്കുള്ള യാത്രയിലാണ് ഇവര്‍ ഡ്രോണ്‍ ആക്രമണത്തില്‍ കൊല്ലപ്പെട്ടതെന്ന് പേര് വെളിപ്പെടുത്താത്ത സുരക്ഷാ ഉദ്യോഗസ്ഥന്‍ മാധ്യമങ്ങളോട് വെളിപ്പെടുത്തി.

ഈയാഴ്ച ഇത് മൂന്നാം തവണയാണ് യമനില്‍ അമേരിക്ക ഡ്രോണ്‍ ആക്രമണം നടത്തുന്നത്. നേരത്തെയും നിരവധി തവണ അമേരിക്കയുടെ ഡ്രോണ്‍ ആക്രമണത്തില്‍ യമനില്‍ നിരവധി അല്‍ ഖായിദ പ്രവര്‍ത്തകര്‍ കൊല്ലപ്പെടുകയും ചെയ്തിട്ടുണ്ട് .