തൊടുപുഴ: കേരള പൊലിസ് അസോസിയേഷന്റെ 2016-18 ഭരണകാലത്തേക്കുള്ള ഭാരവാഹി തെരഞ്ഞെടുപ്പിനുള്ള നാമനിര്‍ദേശപത്രികാ സമര്‍പ്പണം പൂര്‍ത്തിയായപ്പോള്‍ 57 സീറ്റുകളില്‍ എതിരില്ല. ഇതോടെ ഇടുക്കി ജില്ലാ കമ്മിറ്റി ഔദ്യോഗികവിഭാഗം നിലനിര്‍ത്തുമെന്ന് ഉറപ്പായി.
ആകെ 64 സീറ്റുകളാണ് ഉള്ളത്. എ.ആര്‍ ക്യാംപില്‍ മൂന്നു സീറ്റിലും ലോക്കല്‍ സ്‌റ്റേഷനില്‍ നാലിടത്തും മാത്രമാണ് യു.ഡി.എഫ് അനുകൂലികള്‍ പത്രിക സമര്‍പ്പിച്ചത്. യു.ഡി.എഫ് സര്‍ക്കാരിന്റെ കാലത്ത് നടന്ന അസോസിയേഷന്‍ തെരഞ്ഞെടുപ്പിലും ജില്ലയില്‍ ഇപ്പോഴത്തെ ഔദ്യോഗികവിഭാഗം ജില്ലാ കമ്മിറ്റി പിടിച്ചെടുത്തിരുന്നു. പത്രികകളുടെ സൂക്ഷ്മപരിശോധന ഇന്ന് രാവിലെ 10ന് നടക്കും. നാളെ ഉച്ചകഞ്ഞ് മൂന്നുവരെയാണ് പത്രിക പിന്‍വലിക്കാനുള്ള സമയം. അന്തിമസ്ഥാനാര്‍ഥിപട്ടിക ബുധനാഴ്ച പ്രസിദ്ധീകരിക്കും. യൂനിറ്റ്തല തെരഞ്ഞെടുപ്പ് ഒക്‌ടോബര്‍ മൂന്നിനാണ്. ജില്ലാ ഭാരവാഹി തെരഞ്ഞെടുപ്പ് 14 നും സംസ്ഥാന ഭാരവാഹി തെരഞ്ഞെടുപ്പ് 28നും നടക്കും.