വടക്കാഞ്ചേരി: ഗവ. ഹയര്‍ സെക്കന്‍ഡറി സ്‌കൂളിന് പുതിയ ബ്ലോക്കിന്റെ മഹിമ. സ്‌കൂളിന്റെ അടിസ്ഥാന സൗകര്യ വികസനത്തിനായി സംസ്ഥാന സര്‍ക്കാര്‍ അനുവദിച്ച ഒന്നര കോടി രൂപ ചെലവഴിച്ച് പണി പൂര്‍ത്തീകരിച്ച 9 ക്ലാസ് മുറികളോടുകൂടിയ മൂന്ന് നില കെട്ടിടത്തിന്റെ ഉദ്ഘാടനം ഒക്ടോബര്‍ 8 ന് നടക്കും. രാവിലെ 10 ന് വിദ്യാഭ്യാസ വകുപ്പ് മന്ത്രി പ്രൊഫസര്‍. സി.രവീന്ദ്രനാഥാണ് ഉദ്ഘാടകന്‍. അനില്‍ അക്കര എം.എല്‍.എ അധ്യക്ഷനാകും. എം.പിമാരായ പി.കെ ബിജു, സി.പി നാരായണന്‍, മുന്‍ സഹകരണ വകുപ്പ് മന്ത്രി സി.എന്‍ ബാലകൃഷ്ണന്‍ എന്നിവര്‍ മുഖ്യാതിഥികളാകും. ഉദ്ഘാടനത്തോടനുബന്ധിച്ച് സ്‌കൂളിലെ എന്‍.എസ്.എസ് വളണ്ടിയര്‍മാരുടെ നേതൃത്വത്തില്‍ രക്തദാനവും സംഘടിപ്പിച്ചിട്ടുണ്ട്. സ്വാഗത സംഘം രൂപീകരണ യോഗത്തില്‍ നഗരസഭ അധ്യക്ഷ ശിവപ്രിയ സന്തോഷ് അധ്യക്ഷനായി. സ്‌കൂള്‍ പ്രിന്‍സിപ്പല്‍ വി.ചന്ദ്രശേഖരന്‍, വിഎച്ച്.എസ്.ഇ പ്രിന്‍സിപ്പല്‍ ഷെറിന്‍ സലീം, പ്രധാന അധ്യാപിക സി.കമലാദേവി, പി.ടി.എ പ്രസിഡന്റ് നന്ദകുമാര്‍ മേനോന്‍, മാതൃസംഗമം പ്രസിഡന്റ് സജിനി ജിപ്‌സണ്‍ തുടങ്ങിയവര്‍ പ്രസംഗിച്ചു. സ്വാഗത സംഘം ഭാരവാഹികളായി അനില്‍ അക്കര എം.എല്‍.എ (രക്ഷാധികാരി), ശിവപ്രിയ സന്തോഷ് (ചെയര്‍പേഴ്‌സണ്‍) എന്നിവരെ തിരഞ്ഞെടുത്തു.