കയ്പമംഗലം: പെരിഞ്ഞനത്ത് സാമൂഹ്യ വിരുദ്ധരുടെ അഴിഞ്ഞാട്ടം രൂക്ഷമാകുന്നു. കഴിഞ്ഞ ദിവസം ഒരു വീട്ടിലെ മൂന്നു കാറുകളാണ് ഇരുളിന്റെ മറവില്‍ സാമൂഹ്യ വിരുദ്ധര്‍ അടിച്ചു തകര്‍ത്തത്.
പെരിഞ്ഞനം വെസ്റ്റ് നെടുംപറമ്പ് പള്ളിയുടെ പടിഞ്ഞാറു ഭാഗത്ത് താമസിക്കുന്ന മുടവന്‍പറമ്പില്‍ മുഹമ്മദാലിയുടെ മൂന്നു കാറുകളാണ് അക്രമികള്‍ അടിച്ചു തകര്‍ത്തത്. ഇന്നലെ പുലര്‍ച്ചെ ഒരുമണിയോടു കൂടിയായിരുന്നു സംഭവം. മുഹമ്മദാലിയുടെ രണ്ട് ഇന്നോവയും ഒരു റിറ്റ്‌സ് കാറുമാണ് അടിച്ചു തകര്‍ത്തിട്ടുള്ളത്.
അര്‍ധരാത്രി കാറിലെത്തിയ അക്രമി സംഘത്തില്‍ നിന്ന് മുഖംമൂടി ധരിച്ച ഒരാള്‍ ആയുധങ്ങളുമായി മുഹമ്മദാലിയുടെ വീട്ടുമതില്‍ ചാടിക്കടക്കുയും കാറുകള്‍ അടിച്ചു തകര്‍ക്കുകയുമായിരുന്നു.
അക്രമി മതില്‍ ചാടിക്കടക്കുന്നതും വാഹനങ്ങള്‍ അടിച്ചു തകര്‍ക്കുന്നതും വീട്ടിലെ സി.സി.ടി.വിയില്‍ പതിഞ്ഞിട്ടുണ്ട്. ആക്രമണത്തില്‍ മൂന്നു കാറുകളുടേയും ചില്ലുകള്‍ പൂര്‍ണമായും തകര്‍ന്നിട്ടുണ്ട്. വാഹനങ്ങള്‍ തല്ലിത്തകര്‍ക്കുന്നതിന്റെ ശബ്ദം കേട്ട് വീട്ടുകാര്‍ ഉണര്‍ന്ന് പുറത്ത് വരുമ്പോഴേക്കും അക്രമി സംഘം കാറില്‍ കയറി രക്ഷപ്പെട്ടു. മുഹമ്മദാലിയും രണ്ട് സഹോദരന്‍മാരും ഒരു മതില്‍ക്കെട്ടിനുള്ളില്‍ മൂന്ന് വീടുകളിലായാണ് താമസിക്കുന്നത്. സംഭവമറിഞ്ഞ് മതിലകം പൊലിസ് സ്ഥലത്തെത്തി അന്വേഷണം ആരംഭിച്ചു.