തളിപ്പറമ്പ്: കരിമ്പം പുതിയകണ്ടം ഉദയ സ്വാശ്രയ സംഘം പ്രവര്‍ത്തകര്‍ സംസ്ഥാന പാതയോരം ശുചീകരിച്ചു. കരിമ്പം പാലത്തിനു സമീപം തളിപ്പറമ്പ്-ഇരിട്ടി സംസ്ഥാനപാതയില്‍ ഇരുവശത്തും റോഡിലേക്കു വളര്‍ന്ന കാടാണ് വെട്ടിത്തെളിച്ചത്. കരിമ്പം ഫാം സ്റ്റോപ്പ് കഴിഞ്ഞു പഴയ കൃഷിഭവന്‍ മുതല്‍ റോഡിനു വീതി കുറവാണ്.
ഇവിടെ കാടുവളര്‍ന്നതോടെ കാല്‍നടയാത്രക്കാര്‍ റോഡിലേക്കു കയറി നടക്കേണ്ട അവസ്ഥ വന്നപ്പോഴാണ് സ്വാശ്രയ സംഘം പ്രവര്‍ത്തകര്‍ ഇടപെട്ടു കാടു വെട്ടിതെളിച്ചത്. യാത്രക്കാരും മറ്റും വലിച്ചെറിഞ്ഞ പ്‌ളാസ്റ്റിക്ക് മാലിന്യങ്ങളും നീക്കം ചെയ്തു. പതിവായി അപകടം നടക്കുന്ന ഈ ഭാഗത്ത് കരിമ്പം ഫാമിന്റെ സ്ഥലം ഏറ്റെടുത്തു റോഡിന്റെ ഇരുവശവും വീതികൂട്ടി നടപ്പാതയൊരുക്കണമെന്നാണ് ഉദയ സ്വാശ്രയ സംഘം പ്രവര്‍ത്തകര്‍ ആവശ്യപ്പെടുന്നത്.
ഈ വിഷയം എം.എല്‍.എയുടെ ശ്രദ്ധയില്‍ പെടുത്താനുള്ള ഒരുക്കത്തിലാണ് പ്രവര്‍ത്തകര്‍. സംഘം പ്രസിഡന്റ് ടി.പി ബാബുരാജന്‍, സെക്രട്ടറി ഇ സുരേഷ്ബാബു, എം.വി വേണുഗോപാല്‍ എന്നിവര്‍ നേതൃത്വം നല്‍കി.