ചെറുപുഴ: റവന്യൂ ജില്ലാ അക്വാട്ടിക് ചാംപ്യന്‍ഷിപ്പില്‍ തുടര്‍ച്ചയായി 24ാംവര്‍ഷവും കോഴിച്ചാല്‍ ഗവ.ഹയര്‍സെക്കന്‍ഡറി സ്‌കൂള്‍ നീന്തലിലെ ചാംപ്യന്‍പട്ടം നിലനിര്‍ത്തി. മാങ്ങാട്ടുപറമ്പ കെ.എ.പി ക്യാംപിലെ നീന്തല്‍കുളത്തില്‍ നടന്ന മത്സരത്തില്‍ 241 പോയിന്റുകള്‍ നേടിയാണു കോഴിച്ചാല്‍ സ്‌കൂളിലെ താരങ്ങള്‍ ചാംപ്യന്‍ഷിപ്പു നിലനിര്‍ത്തിയത്. സ്വന്തമായി നീന്തല്‍ കുളമില്ലാത്തതിനാല്‍ കാര്യങ്കോട് പുഴയിലെ മീന്തുള്ളിക്കടവിലെ കുത്തൊഴുക്കില്‍ നീന്തിയാണ് ഇവിടുത്തെ കുട്ടികള്‍ പരിശീലനം നേടുന്നത്. കായികാധ്യാപകന്‍ സജി മാത്യുവിന്റെയും പി.ടി.എയുടെയും അകമഴിഞ്ഞ സേവനമാണ് നീന്തല്‍ ഉള്‍പ്പെടെയുള്ള കായിക ഇനങ്ങളില്‍ സ്‌കൂളിനെ ഓരോ വര്‍ഷവും പുതിയ നേട്ടങ്ങള്‍ കുറിക്കാന്‍ പ്രാപ്തമാക്കുന്നത്. അക്വാറ്റിക് ചാംപ്യന്‍പട്ടം ഒരു തവണകൂടി സ്‌കൂളിലെത്തിച്ച താരങ്ങള്‍ക്ക് ഉജ്വല സ്വീകരണം നല്‍കാനുള്ള ഒരുക്കത്തിലാണ് നാട്ടുകാര്‍.