കണ്ണൂര്‍: സംസ്ഥാന സര്‍ക്കാരിന്റെ നൂറുദിനാഘോഷത്തോടനുബന്ധിച്ച് ജില്ലാ ഇന്‍ഫര്‍മേഷന്‍ ഓഫിസ് കണ്ണൂര്‍ ഗവ. വൊക്കേഷണല്‍ ഹയര്‍ സെക്കന്‍ഡറി സ്‌കൂളില്‍ സംഘടിപ്പിച്ച ചിത്രരചനാ മത്സരം ജലവുമായി ബന്ധപ്പെട്ട കുരുന്നുഭാവനകള്‍ക്ക് നിറം പകരുന്നതായി.
ജലദൗര്‍ലഭ്യത്തെക്കുറിച്ചും ഭാവിയിലുണ്ടായേക്കാവുന്ന ജലയുദ്ധങ്ങളെക്കുറിച്ചുമുള്ള ആശങ്കകളും അവയ്ക്കുമേല്‍ മഴയായി പെയ്തിറങ്ങി പച്ചപ്പായി പടരുന്ന പ്രതീക്ഷകളും ചിത്രങ്ങളില്‍ നിറഞ്ഞു. ചിത്രകാരന്‍ കെ കെ മാരാര്‍ മത്സരം ഉദ്ഘാടനം ചെയ്തു. ജില്ലയിലെ വിവിധ ഭാഗങ്ങളില്‍ നിന്നുള്ള നൂറിലേറെ സ്‌കൂള്‍ വിദ്യാര്‍ഥികള്‍ മത്സരത്തില്‍ പങ്കെടുത്തു.
വിദ്യാര്‍ഥികള്‍ക്കായി 'എന്റെ സ്വപ്‌നത്തിലെ കേരളം' എന്ന വിഷയത്തില്‍ ഉപന്യാസ രചനാ മത്സരവും നടന്നു. ജില്ലാ ലൈബ്രറി കൗണ്‍സില്‍ സെക്രട്ടറി പി.കെ ബൈജു, കെ ശിവദാസന്‍ മാസ്റ്റര്‍, ജില്ലാ ഇന്‍ഫര്‍മേഷന്‍ ഓഫിസര്‍ ഇ.കെ പത്മനാഭന്‍, സി.പി അബ്ദുല്‍ കരീം എന്നിവര്‍ സംസാരിച്ചു.