പയ്യന്നൂര്‍: രാമന്തളി പഞ്ചായത്തിലെ പാലക്കോട് മത്സ്യ ബന്ധനതുറുമുഖത്തില്‍ രൂപപ്പെട്ട മണല്‍തിട്ടകാരണം മത്സ്യത്തൊഴിലാളികള്‍ ദുരിതമനുഭവിക്കുന്നു. വലിയ കടപ്പുറം അഴിമുഖത്തെ വലിയ മണല്‍തിട്ടയാണു തൊഴിലാളികള്‍ക്കു വിലങ്ങുതടിയാകുന്നത്.  ഇതുകാരണം വേലിയേറ്റ സമയത്തു മാത്രമാണ് തൊഴിലാളികള്‍ക്കു കടലില്‍ പോകാന്‍ കഴിയുന്നത്. മത്സ്യം ധാരാളമായി കിട്ടുന്ന സന്ധ്യാസമയങ്ങളില്‍ തൊഴിലാളികള്‍ക്കു കടലില്‍ പോകാന്‍  കഴിയുന്നില്ല. വേലിയേറ്റ സമയങ്ങളില്‍ പോയവര്‍ക്ക് നിശ്ചിത സമയത്തിനുള്ളില്‍ മടങ്ങാന്‍ കഴിഞ്ഞില്ലെങ്കില്‍ മണിക്കൂറുകളോളം കടലില്‍  കാത്തുനില്‍ക്കേണ്ടി വരികയാണ്.
     കണ്ണൂര്‍, കാസര്‍കോട് ജില്ലകളിലെ വിവിധ ഭാഗങ്ങളില്‍ നിന്നായി നൂറുകണക്കിനു ഫൈബര്‍ വള്ളങ്ങളാണ് പാലക്കോട്  തുറമുഖത്തിലെത്തുന്നത്. മംഗളൂരു ഉള്‍പ്പടെ പ്രധാന മാര്‍ക്കറ്റുകളിലേക്ക് ഇവിടെ നിന്നു മത്സ്യം കയറ്റി അയക്കുന്നുണ്ട്.
തുറമുഖത്തിന്റെ  പ്രവര്‍ത്തനം ആരംഭിച്ച ഘട്ടത്തില്‍ തന്നെ മണല്‍തിട്ടയുടെ പ്രശ്‌നമുണ്ടായിരുന്നു. എന്നാല്‍ വര്‍ഷം കഴിയുന്തോറും കൂടുതല്‍ മണല്‍ ഇവിടെ അടിയുകയാണ്.  മണല്‍തിട്ടയെ കുറിച്ചറിയാതെ ഇതു വഴി വന്ന നിരവധി വള്ളങ്ങള്‍ മറിഞ്ഞിട്ടുണ്ട്. ഇതു കാരണം ലക്ഷക്കണക്കിനു രൂപയുടെ എഞ്ചിനും വലയും തൊഴിലാളികള്‍ക്കു നഷ്ടപ്പെട്ടു.
     പ്രശ്‌നത്തിനു പരിഹാരം കാണണമെന്നാവശ്യപ്പെട്ട് മത്സ്യതൊഴിലാളികള്‍ മാറി മാറി വന്ന സര്‍ക്കാരുകള്‍ക്ക് നിവേദനം നല്‍കിയെങ്കിലും ഫലമുണ്ടായില്ല.  തുറമുഖവകുപ്പ് അധികൃതര്‍  ഇക്കാര്യത്തില്‍ ഇടപെടാന്‍ മടിച്ചതോടെ പാലക്കോട്, പുതിയങ്ങാടി കടക്കോടതി സംരക്ഷണ സമിതിയുടെ നേതൃത്വത്തില്‍ മണല്‍തിട്ട മുറിച്ചുമാറ്റി ബോട്ടുകള്‍ക്കു പോകാനുള്ള വഴിയുണ്ടാക്കാന്‍ ശ്രമം നടത്തിയിരുന്നു. ജെ.സി.ബി ഉപയോഗിച്ച് ഒരാഴ്ചയോളം ശ്രമം നടത്തിയെങ്കിലും വിജയിച്ചില്ല.
ഒരു ലക്ഷം രൂപയാണ് ഈയിനത്തില്‍ മത്സ്യ തൊഴിലാളികള്‍ക്കു നഷ്ടം വന്നത്.
      ഈ പ്രദേശത്തു പുലിമുട്ട് നിര്‍മാണമാണു പ്രശ്‌നത്തിനു ശാശ്വതമായ പരിഹാരമെന്നു മത്സ്യതൊഴിലാളികള്‍ പറയുന്നു. പുലിമുട്ട് നിര്‍മാണത്തിലൂടെ കടപ്പുറത്തു മണല്‍തിട്ട മാറ്റപ്പെടുന്നതോടൊപ്പം വെള്ളം ഉയരുകയും ചെയ്യും.
ഇക്കാര്യത്തില്‍ സര്‍ക്കാറിന്റെ ഭാഗത്തു നിന്ന് അനുകൂല നടപടിയുണ്ടാകുമെന്നാണ് മത്സ്യതൊഴിലാളികളുടെ പ്രതീക്ഷ.