തളിപ്പറമ്പ്: മംഗലശ്ശേരി നവോദയ ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബ്ബും, ഡി.ടി.പി.സിയും സംയുക്തമായി സംഘടിപ്പിച്ച നാലാമത് മലബാര്‍ ജലമേളക്ക് ആവേശകരമായ പര്യവസാനം. മംഗലശ്ശേരി പുഴയുടെ തീരത്ത് കാണികളായെത്തിയ ആയിരക്കണക്കിനാളുകളെ സാക്ഷിയാക്കി 25 പേര്‍ തുഴയുന്ന ചുരുളന്‍ വളളങ്ങളുടെ മത്സരത്തില്‍ എ.കെ.ജി പോടോത്തുരുത്തി ഒന്നാം സ്ഥാനവും, എ.കെ.ജി.മയിച്ച ബി.ടീം രണ്ടാം സ്ഥാനവും, ലൂസേഴ്‌സ് മത്സരത്തില്‍ വയക്കര മയിച്ച ഒന്നാം സ്ഥാനവും, ഇ.എം.എസ്.മുഴക്കീല്‍ രണ്ടാം  സ്ഥാനവും നേടി. 15 പേര്‍ തുഴയുന്ന ചുരുളന്‍ വളളങ്ങളുടെ മത്സരത്തില്‍ എ.കെ.ജി.പോടോത്തുരുത്തി ഒന്നാം സ്ഥാനവും, എ.കെ.ജി.മയിച്ച ബി.ടീം രണ്ടാം സ്ഥാനവും നേടി. നെഹ്രുട്രോഫി വളളംകളി മത്സരങ്ങളില്‍ പങ്കെടുത്ത ടീമുകള്‍ ഉള്‍പ്പെടെ പങ്കെടുത്തു. ടൂറിസം മന്ത്രി കടന്നപ്പള്ളി രാമചന്ദ്രന്‍ ജലമേള ഉദ്ഘാടനം ചെയ്തു. ടി.വി രാജേഷ് എം.എല്‍.എ അധ്യക്ഷനായി. സിനിമാ നടന്‍ മനോജ് കെ ജയന്‍ മുഖ്യാതിഥിയായി. പരിപാടിയുടെ ഭാഗമായി നിശ്ചലദൃശ്യങ്ങളുടെ മത്സരം, ജലഘോഷയാത്ര, ജലസാഹസിക പ്രകടനങ്ങള്‍, കയാക്കിഗ്, റോവിങ്, ഗാനമേള അരങ്ങേറി.