കോഡൂര്‍: ഭവന പദ്ധതി പ്രഖ്യാപനത്തോടെ ചെമ്മങ്കടവ്  ഹയര്‍സെക്കന്‍ഡറി സ്‌കൂള്‍ വിദ്യാര്‍ഥികള്‍ എന്‍.എസ്.എസ് ദിനാചരണം നടത്തി. പദ്ധതി പ്രകാരം ചെമ്മങ്കടവ് പി.എം.എസ്.എ.എം.എ  ഹയര്‍സെക്കന്‍ഡറി സ്‌കൂളിലെ എന്‍.എസ്.എസ് യൂനിറ്റ് ഈസ്റ്റ് കോഡൂരിലെ നിര്‍ധന കുടുംബത്തിന് ഭവന നിര്‍മാണത്തിന് സഹായിക്കും.
ചെമ്മങ്കടവ് ഹൈസ്‌കൂളിലെ സ്‌കൗട്ട് യൂനിറ്റിന്റെ രണ്ടാമത്തെ  ഭവന നിര്‍മാണം നടന്നു കൊണ്ടിരിക്കുകയാണ്. ഇത് കൂടാതെയാണ് സ്‌കൂളിലെ എന്‍.എസ്.എസ് യൂനിറ്റ് പുതിയ പദ്ധതി നടപ്പാക്കുന്നത്. ദിനാചരണത്തിന്റെ ഉദ്ഘാടനവും ഭവന നിര്‍മാണ പദ്ധതി  പ്രഖ്യാപനവും നിയമസഭ പ്രതിപക്ഷ ഉപനേതാവ് പി.കെ കുഞ്ഞാലിക്കുട്ടി നിര്‍വ്വഹിച്ചു. പി.ടി.എ പ്രസിഡന്റ് എന്‍. കുഞ്ഞീതു അധ്യക്ഷനായി. പി. ഉബൈദുള്ള എം.എല്‍.എ, എം.ടി.എ പ്രസിഡന്റ്  റജുല പെലത്തൊടി, ഹയര്‍സെക്കന്‍ഡറി പ്രിന്‍സിപ്പല്‍ കെ.ജി പ്രസാദ്, ഹൈസ്‌കൂള്‍ പ്രഥമാധ്യാപകന്‍ പി. അബ്ദുല്‍ നാസര്‍, എന്‍.എസ്.എസ് പ്രോഗ്രാം ഓഫീസര്‍ എന്‍.കെ ഹഫ്‌സല്‍ റഹ്മാന്‍, സ്‌കൗട്ട്  അധ്യപകന്‍ അബ്ദുറഹൂഫ് വരിക്കോടന്‍, സ്‌കൂള്‍ മാനേജര്‍ എന്‍.കെ കുഞ്ഞിമുഹമ്മദ്, ഫാത്തിമ വട്ടോളി, അധ്യാപകരായ പി.എം ഉസ്മാന്‍, കെ.എസ് അനൂപ്, മുന്‍ പ്രിന്‍സിപ്പല്‍ ടി.എ കബീര്‍, ചോലക്കല്‍ മുഹമ്മദ്കുട്ടി, വി. മുഹമ്മദ് കുട്ടിഹാജി സംസാരിച്ചു.
എന്‍.എസ്.എസ് യൂനിറ്റ് ലീഡര്‍മാരായ പി. ഹംറാസ് മുഹമ്മദ്, എം.ടി നസീബ തസ്‌നീം, എ.കെ മുഹമ്മദ് ശബീര്‍, ഫാത്തിമ ഷെറിന്‍ ഷഹാന എന്നിവര്‍ നേതൃത്വം നല്‍കി.