തദ്ദേശ സ്വയംഭരണ സ്ഥാപനങ്ങള്‍ ഉള്‍പ്പെടെയുള്ള കേന്ദ്ര സംസ്ഥാന സര്‍ക്കാര്‍ വകുപ്പുകള്‍, പൊതുമേഖലാ സ്ഥാപനങ്ങള്‍, സഹകരണ സ്ഥാപനങ്ങള്‍, സ്വകാര്യമേഖലാ സ്ഥാപനങ്ങള്‍ എന്നിവയില്‍ ജോലി ചെയ്യുന്ന അന്ധര്‍, ബധിരര്‍, അസ്ഥിസംബന്ധ വൈകല്യമുള്ളവര്‍, മാനസിക വെല്ലുവിളി നേരിടുന്നവര്‍, ബുദ്ധിമാന്ദ്യം സംഭവിച്ചവര്‍ എന്നീ വിഭാഗങ്ങളില്‍പ്പെട്ട വികലാംഗ ജീവനക്കാര്‍ക്കും ഏറ്റവും കൂടുതല്‍ വികലാംഗര്‍ക്കു തൊഴില്‍ നല്‍കിയിട്ടുള്ള തൊഴില്‍ദായകര്‍ക്കും വികലാംഗ ക്ഷേമരംഗത്ത് മികച്ച സേവനം അനുഷ്ഠിക്കുന്ന സ്ഥാപനങ്ങള്‍ക്കുമായി 2016 വര്‍ഷത്തേക്കുള്ള സംസ്ഥാന അവാര്‍ഡിന് നിശ്ചിത ഫോമില്‍ അപേക്ഷ ക്ഷണിച്ചു.
മുന്‍വര്‍ഷങ്ങളില്‍ സംസ്ഥാന അവാര്‍ഡ് ലഭിച്ചിട്ടുള്ളവര്‍ വീണ്ടും അപേക്ഷിക്കാന്‍ പാടില്ല.
ആകെ ജീവനക്കാരില്‍ രണ്ടോ അതിലധികമോ ശതമാനം ജീവനക്കാര്‍ വികലാംഗരാണെങ്കില്‍ മാത്രമേ സ്ഥാപനങ്ങള്‍ക്കു തൊഴില്‍ദായകര്‍ക്കുള്ള അവാര്‍ഡിന് അപേക്ഷിക്കാന്‍ അര്‍ഹതയുള്ളൂ. ക്യാഷ് അവാര്‍ഡും സര്‍ട്ടിഫിക്കറ്റും ചേര്‍ന്നതാണ് അവാര്‍ഡ്. നിശ്ചിത ഫോമില്‍ പൂരിപ്പിച്ച അപേക്ഷ അപേക്ഷകന്റെ ഔദ്യോഗിക രംഗത്തെ പ്രവര്‍ത്തനം, മറ്റു പ്രവര്‍ത്തന മണ്ഡലങ്ങളെ സംബന്ധിച്ച വിവരങ്ങള്‍ കഴിവുകള്‍ വ്യക്തമാക്കുന്നതിനുള്ള വിവരങ്ങള്‍ (സി.ഡിയിലും) വൈകല്യം തെളിയിക്കുന്നതിനുള്ള രേഖകള്‍, ഫോട്ടോ പാസ്‌പോര്‍ട്ട് ആന്‍ഡ് ഫുള്‍സൈസ് (വൈകല്യം ബോധ്യപ്പെടുന്ന രീതിയിലുള്ളത്) സഹിതം ഒക്ടോബര്‍ 20നു മുന്‍പ് അതത് ജില്ലാ സാമൂഹ്യനീതി ഓഫിസുകളില്‍ എത്തിക്കണം.
സ്ഥാപനങ്ങളുടെ അപേക്ഷയില്‍ അതിന്റെ പ്രവര്‍ത്തനങ്ങളും ഫോട്ടോയും സി.ഡിയില്‍ ഉള്‍പ്പെടുത്തി, പൂരിപ്പിച്ച അപേക്ഷാഫോം സമര്‍പ്പിക്കണം. വിശദവിവരങ്ങള്‍ www.swdk-erala.gov.in ല്‍ ലഭ്യമാണ്.