നീലേശ്വരം: കഴിഞ്ഞ ദിവസം നിര്യാതനായ കെ മാധവന്‍ നീലേശ്വരത്തിനു സ്വന്തം മാഷാണ്. അദ്ദേഹത്തില്‍ നിന്നു പ്രചോദനമുള്‍ക്കൊണ്ടാണ് കന്നട എഴുത്തുകാരനായ നിരഞ്ജന പിന്നീട് കയ്യൂര്‍ സമരം ആസ്പദമാക്കിയുള്ള ചിരസ്മരണ എന്ന നോവല്‍ രചിച്ചത്. അതിലെ മാഷ് എന്ന എന്ന കഥാപാത്രം മാധവേട്ടനാണെന്നു നിരഞ്ജന പിന്നീടു പറഞ്ഞിട്ടുമുണ്ട്. കെ മാധവന്‍ നീലേശ്വരം രാജാസ് ഹൈസ്‌കൂളില്‍ പഠിക്കുന്ന കാലത്തായിരുന്നു ഗാന്ധിജിയുടെ കേരളാ സന്ദര്‍ശനം. അദ്ദേഹത്തിന്റെ വരവു ആഘോഷമാക്കിമാറ്റാന്‍ അന്നത്തെ കാസര്‍കോട് താലൂക്കിലെ കാഞ്ഞങ്ങാട്ടേയും നീലേശ്വരത്തേയും ജനങ്ങള്‍ തീരുമാനിച്ചു. ഇതിന്റെ ഭാഗമായി നീലേശ്വരത്തുകാരനായിരുന്ന വിദ്വാന്‍ പി കേളുനായര്‍ 'നാളെയാണല്ലോ നാളെയാണല്ലോ' ആ പുണ്യദിനം എന്ന ഗാനവും രചിച്ചു. ഗ്രാമഗ്രാമാന്തരങ്ങളില്‍ അന്നു ഈ ഗാനം അലയടിച്ചിരുന്നു. മംഗളൂരുവിലേക്കുള്ള യാത്രയ്ക്കിടയില്‍ രാജാസിലെ വിദ്യാര്‍ഥികളും അധ്യാപകരും റെയില്‍വേ സ്റ്റേഷനില്‍ ചെന്നു അദ്ദേഹത്തെ കണ്ടു. ട്രെയിനില്‍ നിന്നു പുറത്തിറങ്ങിയില്ലെങ്കിലും തന്നെ കാണാന്‍ വന്നവരെ ഗാന്ധിജി നിരാശരാക്കിയില്ല. സ്വന്തം കൈപ്പടയില്‍ എഴുതിയ സന്ദേശം അവര്‍ക്കു നല്‍കി. അത് ഇന്നും രാജാസ് സ്‌കൂള്‍ ഓഫിസില്‍ സൂക്ഷിച്ചിട്ടുണ്ട്.
        പിന്നീടു സ്വദേശി പ്രസ്ഥാനത്തിന്റെ ഭാഗമായി ദേശീയ വിദ്യാലയങ്ങള്‍ രൂപം കൊണ്ടു. ഇതിന്റെ ഭാഗമായി വെള്ളിക്കോത്തു സ്ഥാപിച്ച വിജ്ഞാനദായിനി പാഠശാലയില്‍ മാധവനും വിദ്യാര്‍ഥിയായിരുന്നു. തുടര്‍ന്നു ഹിന്ദി വിശാരദ് പാസായ മാധവേട്ടന്‍ നീലേശ്വരം രാജാസില്‍ സായാഹ്ന ഹിന്ദി പാഠശാല ആരംഭിച്ചു. സ്വാതന്ത്ര്യസമരത്തിന്റെ സന്ദേശം വിദ്യാര്‍ഥികളില്‍ എത്തിക്കുക എന്നതായിരുന്നു ഇതിന്റെ ലക്ഷ്യം. ഇദ്ദേഹത്തിന്റെ കീഴിലാണു ഹോസ്റ്റലില്‍ താമസിച്ചു കൊണ്ട് നിരഞ്ജന ഹിന്ദി പഠിച്ചത്. മാധവേട്ടനിലൂടെ സ്വാതന്ത്ര്യസമരത്തിന്റെ ആവേശം നിരഞ്ജനയിലും നിറഞ്ഞു. തുടര്‍ന്നാണു ചിരസ്മരണ രചിക്കുന്നത്.
         എപ്പോഴെങ്കിലും വീണ്ടും നീലേശ്വരത്തു പോകാന്‍ സാധിച്ചാല്‍ രാജാസ് ഹൈസ്‌കൂളിന്റെ പൂന്തോട്ടത്തില്‍ വിടര്‍ന്നു നില്‍ക്കാറുള്ള റോസാപൂക്കള്‍ പറിച്ചെടുക്കുകയും കയ്യൂര്‍ രക്തസാക്ഷി മണ്ഡപത്തില്‍ അര്‍പ്പിക്കുകയും വേണമെന്നു പിന്നിട് നിരഞ്ജന തന്നെ രേഖപ്പെടുത്തിയിട്ടുണ്ട്. ഗാന്ധിജിയെയും നീലേശ്വരത്തേയും കുറിച്ചുള്ള ഓര്‍മകള്‍ എന്നും മാധവേട്ടനില്‍ നിറഞ്ഞു നിന്നിരുന്നതായി മുന്‍ കണ്ണൂര്‍ സര്‍വകലാശാല പരീക്ഷാ കണ്‍ട്രോളറും ചരിത്രാധ്യാപകനും ഇപ്പോഴത്തെ നീലേശ്വരം നഗരസഭാ ചെയര്‍മാനുമായ പ്രൊഫ.കെ.പി ജയരാജന്‍ സ്മരിക്കുന്നു.