തിരൂര്‍: പൂങ്ങോട്ടുകുളത്തെ കച്ചവട സ്ഥാപനങ്ങളില്‍ പുലര്‍ച്ചെ കവര്‍ച്ചാശ്രമം. കടകളുടെ പൂട്ടു തകര്‍ത്ത് അകത്തുകയറിയ മോഷ്ടാവിന്റെ ദൃശ്യങ്ങള്‍ സി.സി.ടി.വി കാമറയില്‍ പതിഞ്ഞു. എന്നാല്‍, മോഷ്ടാവ് പര്‍ദ ധരിച്ചിരുന്നതിനാല്‍ ആളെ തിരിച്ചറിയാനായിട്ടില്ല.
പൂങ്ങോട്ടുകുളത്തെ നാലു കടകളിലാണ് മോഷണശ്രമമുണ്ടായത്. കുറ്റിപ്പുറം റോഡിലെ അല്‍ബത്തൂര്‍ പര്‍ദ ഷോപ്പ്, ഫ്‌ളവേഴ്‌സ് ലേഡി ഷോപ്പ്, സമീപത്തെ കൂള്‍ബാര്‍ എന്നിവിടങ്ങളിലാണ് കള്ളന്‍ കയറിയത്. അല്‍ബത്തൂര്‍ പര്‍ദ ഷോപ്പില്‍ കയറിയ മോഷ്ടാവിന്റെ ദൃശ്യങ്ങള്‍ കാമറയില്‍ പതിഞ്ഞു. മോഷ്ടാവ് അലമാരയും മറ്റും തുറന്നെങ്കിലും ഒന്നും നഷ്ടപ്പെട്ടിട്ടില്ല. പുലര്‍ച്ചെ മൂന്നിനു ശേഷമാണ് കടകളില്‍ മോഷണശ്രമം നടന്നതെന്നാണ് പ്രാഥമിക നിഗമനം.
തിരൂര്‍ പൊലിസ് കേസെടുത്ത് അന്വേഷണം തുടങ്ങി. കഴിഞ്ഞ മാസവും നഗരത്തിലെ കടകളില്‍ കവര്‍ച്ചാ ശ്രമമുണ്ടായിരുന്നു. തുടര്‍ച്ചയായി സാമൂഹ്യവിരുദ്ധ ശല്യമുണ്ടാകുന്നതിനാല്‍ പൊലിസ് രാത്രികാല പട്രോളിങ് ശക്തമാക്കണമെന്നു വ്യാപാരികള്‍ ആവശ്യപ്പെട്ടു.