കോഴിക്കോട്: ഒക്ടോബര്‍ രണ്ടിന് എസ്.കെ.എസ്.എസ്.എഫ് ജില്ലയില്‍ ആതുരസേവനത്തിനായി 41 സഹചാരി സെന്ററുകള്‍ ആരംഭിക്കും. സംഘടനയുടെ സന്നദ്ധസേവന വിഭാഗമായ വിഖായയുടെ ദിനാചരണത്തിന്റെ ഭാഗമായാണ് സെന്ററുകള്‍ക്ക് തുടക്കം കുറിക്കുന്നത്. വീല്‍ചെയര്‍, വാട്ടര്‍ബെഡ്, എയര്‍ബെഡ്, വാക്കര്‍, സ്ട്രക്ച്ചര്‍, ഫസ്റ്റ്എയിഡ് ബോക്‌സ്, സഹായ വിതരണം, അപേക്ഷ സ്വീകരിക്കല്‍, ഇന്‍ഫര്‍മേഷന്‍ സെന്റര്‍, പി.എസ്.സി, യു.പി.എസ്.സി വിജ്ഞാപന അറിയിപ്പുകള്‍, ഗൈഡ്‌ലൈന്‍, സര്‍ക്കാര്‍-സര്‍ക്കാരേതര ആനൂകൂല്യങ്ങള്‍  അര്‍ഹര്‍ക്ക് എത്തിച്ചു കൊടുക്കല്‍, രക്തദാനം, ആംബുലന്‍സ് സര്‍വിസ് തുടങ്ങി പൊതുസമൂഹത്തിനാവശ്യമായ സേവനങ്ങള്‍ ചെയ്യുകയാണ് സെന്ററിലൂടെ ലക്ഷ്യമിടുന്നത്. വിഖായ വളണ്ടിയര്‍മാരുടെ സേവന കേന്ദ്രമായും സെന്റര്‍ പ്രവര്‍ത്തിക്കും.
ജില്ലാതല ഉദ്ഘാടനം ഒക്ടോബര്‍ രണ്ടിന് വൈകിട്ട് 4.30ന് ഫറോക്ക് മേഖലയില്‍ കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി നിര്‍വഹിക്കുമെന്ന് ജില്ലാ പ്രസിഡന്റ് സയ്യിദ് മുബശ്ശിര്‍ തങ്ങള്‍ ജമലുല്ലൈലി, ജനറല്‍ സെക്രട്ടറി ഒ.പി അഷ്‌റഫ് അറിയിച്ചു.