കൊല്‍ക്കത്ത: പശ്ചിമബംഗാള്‍ നിയസഭയിലേക്കുള്ള നാലാംഘട്ട വോട്ടെടുപ്പ് ആരംഭിച്ചു. 49 സീറ്റുകളിലേക്കാണ് ഇന്നു വോട്ടെടുപ്പ് നടക്കുന്നത്. കഴിഞ്ഞ മൂന്നു ഘട്ടങ്ങളിലും വ്യാപകമായ അക്രമം ഉണ്ടായതിനാല്‍ കനത്ത സുരക്ഷയിലാണ് നാലാം ഘട്ട വോട്ടെടുപ്പ് നടക്കുന്നത്. നോര്‍ത്ത് 24 പാര്‍ഗനാസ്, ഹൗറ ജില്ലകളിലാണ് ഇന്നു വോട്ടെടുപ്പ് നടക്കുന്നത്. തൃണമൂല്‍ കോണ്‍ഗ്രസിന് ഏറെ സ്വാധീനമുള്ള ജില്ലകളാണിത്. 2011 ലെ തെരഞ്ഞെടുപ്പില്‍ 44 സീറ്റുകളും തൃണമൂല്‍ നേടിയിരുന്നു. 12,481 പോളിങ് സ്‌റ്റേഷനുകളിലായി 1.08 കോടി വോട്ടര്‍മാര്‍ 345 സ്ഥാനാര്‍ഥികളില്‍ നിന്ന് പ്രതിനിധികളെ തെരഞ്ഞെടുക്കും. ഇതില്‍ 40 സ്ഥാനാര്‍ഥികള്‍ സ്ത്രീകളാണ്. ഏഴു മന്ത്രിമാരും ഇന്നു മത്സരരംഗത്തുണ്ട്.