തിരുവനന്തപുരം: സ്വാശ്രയ വിഷയത്തില്‍ പ്രതിപക്ഷ ബഹളത്തെ തുടര്‍ന്ന് നിയമസഭ ഇന്നത്തേക്ക് പിരിഞ്ഞു. ഇതോടെ പ്രതിപക്ഷത്തിന്റെ ശ്രദ്ധക്ഷണിക്കലും സബ്മിഷനും സ്പീക്കര്‍ റദ്ദാക്കി. മുഖ്യമന്ത്രിയുടെ പരാമര്‍ശത്തെ തുടര്‍ന്നാണ് പ്രതിപക്ഷം സഭ സ്തംഭിപ്പിച്ചത്.

സ്വാശ്രയ വിഷയത്തില്‍ ഇന്നലെ കെ.എസ്.യു നടത്തിയ വിദ്യാഭ്യാസബന്ദില്‍ സംസ്ഥാനത്ത് നിരവധി സ്ഥലങ്ങളില്‍ പ്രകടനത്തിനു നേരെ പൊലിസിന്റെ അതിക്രമത്തിന് ഉത്തരവാദി മുഖ്യമന്ത്രിയാണെന്ന് പ്രതിക്ഷം ആരോപിച്ചു. എന്നാല്‍, പൊലിസിനെ സമരക്കാര്‍ പ്രകോപിപ്പിച്ചതാണെന്നായിരുന്നു മുഖ്യമന്ത്രിയുടെ മറുപടി. കൂടാതെ സ്വാശ്രമയസമരത്തിനെത്തിയ കെ.എസ്.യുക്കാര്‍ പ്രകടനത്തിനായി വാടകയ്‌ക്കെടുത്തവരാണെന്ന് മുഖ്യമന്ത്രിയുടെ പ്രസ്താവനയാണ് പ്രതിപക്ഷത്തെ കൂടുതല്‍ ചൊടിപ്പിച്ചത്. ഇതോടെ ബഹളത്തില്‍ മുങ്ങിയ സഭാ നടപടികള്‍ തുടരാന്‍ കഴിയാത്ത സാഹചര്യമായതിനാല്‍ സ്പീക്കര്‍ ഇന്നത്തെ സഭ പിരിച്ചുവിടുകയായിരുന്നു.