സുല്‍ത്താന്‍ ബത്തേരി: മതിയായ രേഖകളില്ലാതെ കെ.എസ്.ആര്‍.ടി.സി ബസില്‍ കടത്തുകയായിരുന്ന പന്ത്രണ്ടര ലക്ഷം രൂപയുമായി കര്‍ണാടക സ്വദേശി പിടിയില്‍. മൈസൂരു കെ.ആര്‍ നഗര്‍ താലൂക്ക് സ്വദേശി പുട്ട് രാജ് (44)ആണ് മുത്തങ്ങ എക്‌സൈസ് ചെക്ക്‌പോസ്റ്റ് അധികൃതരുടെ പിടിയിലായത്. ഇന്നലെ ഉച്ചയോടെയാണ് സംഭവം.
മൈസൂരുവില്‍ നിന്ന് കോഴിക്കോട്ടേക്ക് വരികയായിരുന്ന കെ.എസ്.ആര്‍.ടി.സി ബസിലെ യാത്രക്കാരനായിരുന്ന ഇയാള്‍ എക്‌സൈസ് അധികൃതരുടെ വാഹന പരിശോധനക്കിടെയാണ് പിടിയിലായത്. ഇയാളുടെ കൈവശമുണ്ടായിരുന്ന ബാഗില്‍ 500 ന്റെ കെട്ടുകളായാണ് പണം സൂക്ഷിച്ചിരുന്നത്. പുട്ട് രാജിനെയും പിടികൂടിയ പണവും എക്‌സൈസ് അധികൃതര്‍ എന്‍ഫോഴ്‌സ്‌മെന്റിന് കൈമാറി. മാന്തവാടിയിലെ ഒരു അടക്ക വ്യാപാരിക്ക് നല്‍കാനാണ് പണമെത്തിച്ചതെന്നാണ് ഇയാള്‍ എക്‌സൈസിന് നല്‍കിയ മൊഴി.
എക്‌സൈസ് സി.ഐ കെ.എസ് സുരേഷ്, എസ്.ഐ ഷിജു, പ്രിവന്റിവ് ഓഫിസര്‍മാരായ അബൂബക്കര്‍, ഷാജി സിവില്‍ എക്‌സൈസ് ഓഫിസര്‍മാരായ സുരേഷ്, ഏലിയാസ് എന്നിവരുടെ നേതൃത്വത്തിലാണ് പണം പിടികൂടിയത്.