അമ്പലവയല്‍: അമ്പലവയലില്‍ പ്രവര്‍ത്തിക്കുന്ന ബെവ്‌കോ ഔട്ട്‌ലെറ്റ് കുപ്പമുടിയിലേക്ക് മാറ്റാനുള്ള നീക്കത്തിനെതിരേ ജനകീയ പ്രക്ഷോഭം ആരംഭിച്ചു. നിലവില്‍ പ്രവര്‍ത്തിച്ചുകൊണ്ടിരുന്ന കെട്ടിടത്തില്‍ വാടകക്കരാര്‍ പുതുക്കി നല്‍കാന്‍ തയാറാകാത്തതോടെയാണ് പുതിയ സ്ഥലം കണ്ടെത്തുന്നത്. പഴയ ഉടമ കെട്ടിടം വിറ്റു പുതിയ ഉടമയ്ക്ക് കൈമാറ്റം ചെയ്യുമ്പോള്‍ ഔട്ട്‌ലെറ്റ് ഒഴിപ്പിക്കാമെന്ന് കരാര്‍ ഉണ്ടായിരുന്നു. ഇതെതുടര്‍ന്നാണ് ഔട്ട്‌ലെറ്റ് മറ്റു സ്ഥലത്തേക്ക് മാറ്റേണ്ടതായി വന്നത്. മൂന്ന് ദിവസമായി നാട്ടുകാരുടെ നേതൃത്വത്തില്‍ സമരം തുടങ്ങിയിട്ട്. രാത്രിയും പകലും സമരം നടത്തുന്നുണ്ട്.
നവജ്യോതി, അക്ഷയ, ദീപം, അര്‍ച്ചന, നവീന എന്നീ സ്വാശ്രയ സംഘങ്ങള്‍ രാഷ്ട്രീയ പാര്‍ട്ടികള്‍ എന്നിവരുടെ നേതൃതത്തിലാണ് പന്തല്‍ കെട്ടി സമരം നടത്തുന്നത്. ജനങ്ങള്‍ തിങ്ങിപ്പാര്‍ക്കുന്ന മേഖലയിലെ സമാധാനാന്തരീക്ഷം തകര്‍ക്കാന്‍ ആരെയും അനുവദിക്കില്ലെന്ന് നാട്ടുകാര്‍ പറഞ്ഞു.