നെടുമ്പാശ്ശേരി: സംസ്ഥാന ഹജ്ജ് കമ്മിറ്റിയുടെ നേതൃത്വത്തിലുള്ള ഹാജിമാരുടെ ആദ്യസംഘം നാളെ നെടുമ്പാശ്ശേരിയില്‍ മടങ്ങിയെത്തും. 450 തീര്‍ഥാടകരാണ് നാളെ വൈകിട്ട് നാലിന് നെടുമ്പാശ്ശേരി അന്താരാഷ്ട്ര വിമാനത്താവളത്തിലെത്തുന്ന സഊദി എയര്‍ലൈന്‍സ് വിമാനത്തില്‍ തിരിച്ചെത്തുന്നത്. ഇവരെ ഹജ്ജിന്റെ ചുമതലയുള്ള മന്ത്രി കെ.ടി ജലീല്‍, സംസ്ഥാന ഹജ്ജ് കമ്മിറ്റി ചെയര്‍മാന്‍ കോട്ടുമല ബാപ്പു മുസ്‌ലിയാര്‍ എന്നിവരുടെ നേതൃത്വത്തില്‍ സ്വീകരിക്കും.
ആദ്യഘട്ട ഹജ്ജ് ക്യാംപ് പ്രവര്‍ത്തിച്ച എയര്‍ക്രാഫ്റ്റ് മെയിന്റനന്‍സ് ഹാങ്കറില്‍ തന്നെയാണ് രണ്ടാംഘട്ട ഹജ്ജ് ക്യാംപും ഒരുക്കിയിരിക്കുന്നത്. ഹാജിമാരെ സ്വീകരിക്കുന്നതിനുള്ള ഒരുക്കങ്ങള്‍ ഹാങ്കറില്‍ പൂര്‍ത്തിയായിട്ടുണ്ട്. കസ്റ്റംസ്, എമിഗ്രേഷന്‍ തുടങ്ങിയ പരിശോധനകള്‍ക്കായി പ്രത്യേക കൗണ്ടറുകള്‍ ക്രമീകരിച്ചിട്ടുണ്ട്. ഹാജിമാരുമായി എത്തുന്ന സഊദി എയര്‍ലൈന്‍സ് വിമാനം ഹാങ്കറിനു സമീപമുള്ള ടാക്‌സി ബേയില്‍ എത്തിക്കും. അവിടെനിന്നും പ്രത്യേക ബസുകളിലാണ് ഹാജിമാരെ മെയിന്റനന്‍സ് ഹാങ്കറിലേക്കെത്തിക്കുക.
മദീന വിമാനത്താവളത്തില്‍ നിന്നാണ് സംസ്ഥാനത്തു നിന്നുള്ള ഹാജിമാരുടെ നാട്ടിലേക്കുള്ള മടക്കയാത്ര. സഊദി എയര്‍ലൈന്‍സിന്റെ 24 വിമാനങ്ങളാണ് ഹാജിമാരുടെ മടക്കയാത്രക്കായി ഷെഡ്യൂള്‍ ചെയ്തിരിക്കുന്നത്. ഒക്ടോബര്‍ 14നാണ് അവസാന സംഘം ഹാജിമാര്‍ നെടുമ്പാശ്ശേരിയിലെത്തുക. മുഴുവന്‍ ഹാജിമാര്‍ക്കും വിതരണം ചെയ്യുന്നതിനുള്ള സംസം വെള്ളം നേരത്തെതന്നെ എയര്‍ക്രാഫ്റ്റ് മെയിന്റനന്‍സ് ഹാങ്കറില്‍ എത്തിച്ചിട്ടുണ്ട്.