ന്യൂഡല്‍ഹി: ബജറ്റിന്റെ രണ്ടാം ഘട്ട സമ്മേളനത്തിനു തുടക്കമായത് ഉത്തരാഖണ്ഡില്‍ രാഷ്ട്രപതി ഭരണം ഏര്‍പ്പെടുത്തിയതിനെച്ചൊല്ലിയുള്ള തര്‍ക്കത്തോടെ. മറ്റു വിഷയങ്ങളെല്ലാം മാറ്റിവച്ച് ഇരുസഭകളിലും ഉത്തരാഖണ്ഡ് ചര്‍ച്ചയ്‌ക്കെടുക്കണമെന്നാണ് പ്രതിപക്ഷത്തിന്റെ ആവശ്യം. പ്രതിഷേധം ശക്തമായതോടെ രാജ്യസഭ രണ്ടുമണി വരെ നിര്‍ത്തിവച്ചു. ഈ വിഷയം ചര്‍ച്ച ചെയ്യാന്‍ ലോക്‌സഭാ സ്പീക്കര്‍ സുമിത്രാ മഹാജന്‍ ഇന്നലെ സര്‍വകക്ഷി യോഗം വിളിച്ചിരുന്നു. ഇക്കാര്യത്തില്‍ 27ന് സുപ്രിം കോടതി വാദം കേള്‍ക്കാന്‍ തുടങ്ങുമെന്നും അതുവരെ ചര്‍ച്ചയുടെ ആവശ്യമില്ലെന്നുമാണ് ബി.ജെ.പി വാദിച്ചത്. ബി.ജെ.പി ജനാധിപത്യത്തെ സംരക്ഷിക്കുന്നില്ലെന്നും ഭരണഘടനയെ ബഹുമാനിക്കുന്നില്ലെന്നും കോണ്‍ഗ്രസ് നേതാവ് മല്ലികാര്‍ജ്ജുന്‍ ഖാര്‍ഗെ ആരോപിച്ചു. എന്നാല്‍ എല്ലാ കാര്യങ്ങളും ചര്‍ച്ച ചെയ്യാന്‍ തയ്യാറാണെന്നും റൂള്‍ ബുക്ക് അനുസരിച്ച് കാര്യങ്ങള്‍ നീങ്ങുമെന്നും അതുമായി പ്രതിപക്ഷം സഹകരിക്കുമെന്നാണ് പ്രതീക്ഷിക്കുന്നതെന്നും കേന്ദ്രമന്ത്രി രാജീവ് പ്രതാപ് റൂഡി പ്രതികരിച്ചു. ജെ.എന്‍.യു വിഷയം, പത്താന്‍കോട്ട് അന്വേഷണ വിഷയത്തില്‍ ഇന്ത്യയുടെ നിലപാട് എന്നീ കാര്യങ്ങളും ചര്‍ച്ചയ്‌ക്കെടുക്കണമെന്ന് പ്രതിപക്ഷം ശക്തമായി വാദിച്ചു. എന്നാല്‍ ജെ.എന്‍.യു വിഷയം കോടതി പരിഗണനയിലുള്ളതാണെന്നും അതു ചര്‍ച്ച ചെയ്യാനാവില്ലെന്നും സര്‍ക്കാര്‍ അംഗങ്ങള്‍ മറുപടി നല്‍കി. ഇതോടെ കോണ്‍ഗ്രസ് എം.പിമാര്‍ നടുത്തളത്തിലിറങ്ങി പ്രതിഷേധിക്കുകയായിരുന്നു.