മങ്കര: മണ്ണിടിഞ്ഞ് തകര്‍ച്ചാഭീഷണി നേരിടുന്ന കനാല്‍ നവീകരണത്തിന് ഇനിയും നടപടി ഉണ്ടാകാത്തതിനാല്‍ മേഖലയിലെ കര്‍ഷകര്‍ ആശങ്കയില്‍. കനാല്‍ നവീകരിക്കാത്തത് മൂലം മണ്ണൂര്‍ പഞ്ചായത്തിലെ ചേറുമ്പാല, നഗരിപുറം, പാതിരിക്കോട് പാടശേഖരത്തിലെ ഇരുനൂറോളം കര്‍ഷകരാണ് ദുരിതം പേറുന്നത്.
മണ്ണൂരില്‍ നിന്ന് പാടശേഖരങ്ങളിലേക്ക് വെള്ളം പോകുന്ന സബ് കനാലാണ് മണ്ണിടിഞ്ഞും മരം വീണും അടഞ്ഞ് കിടക്കുന്നത്.
30 അടിയോളം താഴ്ചയുള്ള കനാലാണിത്. ഏകദേശം 150 മീറ്റര്‍ ദൂരമാണ് മണ്ണിടിഞ്ഞ് ചാല് പോലും അടഞ്ഞ് കിടക്കുന്നത്.
കര്‍ഷകര്‍ ഒട്ടനവധി പരാതികള്‍ അധികൃതര്‍ക്ക് നല്‍കിയിരുന്നു. നിരന്തര ശ്രമത്തെ തുടര്‍ന്ന് മലമ്പുഴ ഇറിഗേഷന്‍ വകുപ്പ് എന്‍ജിനീയര്‍ വിഭാഗം സ്ഥലത്തെത്തി സബ് കനാല്‍ പരിശോധിച്ചിരുന്നു.
125 മീറ്ററോളം ദൂരം അടിഭാഗത്ത് കൂടി ടണലിട്ട് കനാലിന്റെ മുകള്‍ഭാഗം മണ്ണിട്ട് നികത്തണമെന്നാണ് നിര്‍ദേശം നല്‍കിയത്. ഇതിനായി 25 ലക്ഷം രൂപയുടെ പ്രോജക്റ്റും ഇറിഗേഷന്‍ വകുപ്പ് തയാറാക്കി സര്‍ക്കാറിന് സമര്‍പ്പിച്ചതായാണ് വിവരം.
ഇതിനെല്ലാം കാലതാമസം നേരിടുമെന്നാണ് കര്‍ഷകരുടെ ഭയം.
പദ്ധതി നടപ്പിലാക്കാന്‍ സ്ഥലം എം.എല്‍.എ ഫണ്ട് അനുവദിച്ച് കര്‍ഷകരുടെ പ്രശ്‌നങ്ങള്‍ പരിഹരിക്കുമെന്നാണ് പ്രതീക്ഷയെന്ന് ചേറുമ്പാല പാടശേഖര സമിതി ചെയര്‍മാന്‍ രാധാകൃഷ്ണന്‍ പറഞ്ഞു. പദ്ധതി ഈ വര്‍ഷം നടപ്പിലായില്ലെങ്കില്‍ കനാല്‍ ജലം കിട്ടാതെ 200 ഏക്കര്‍ നെല്‍കൃഷി ഉണങ്ങി നശിക്കും.