കൊടുങ്ങല്ലൂര്‍: ഗര്‍ഭസ്ഥശിശു മരിച്ച സംഭവത്തെതുടര്‍ന്ന് അടച്ചുപൂട്ടിയ സ്വകാര്യ ആശുപത്രിയിലെ ഒ.പി വിഭാഗം വീണ്ടും തുറന്നതില്‍ പ്രതിഷേധിച്ച് മഹിളാസംഘം പ്രവര്‍ത്തകര്‍ ആശുപത്രിക്കുമുന്നില്‍ കുത്തിയിരിപ്പ് സത്യഗ്രഹം നടത്തി. ചൊവ്വാഴ്ച രാവിലെ 10 മണിയോടെയാണ് സി.പി.ഐ ജില്ലാ നിര്‍വാഹക സമിതിഅംഗം മിനി ഷാജിയുടെ നേതൃത്വത്തില്‍ ആശുപത്രിക്ക് മുന്നില്‍ സത്യാഗ്രഹം ആരംഭിച്ചത്. നഗരസഭാ ചെയര്‍മാന്റെ നേതൃത്വത്തില്‍നടന്ന ചര്‍ച്ചയിലെ തീരുമാനങ്ങളെതുടര്‍ന്ന് സത്യാഗ്രഹം പിന്‍വലിക്കുകയായിരുന്നു.
കഴിഞ്ഞ ബുധനാഴ്ച വൈകിട്ടാണ് മിനി ഷാജിയുടെ മകളും മലപ്പുറം പട്ടയില്‍ ജിനീഷിന്റെ ഭാര്യയുമായ അഭിരാമി(20)യുടെ ആറുമാസം പ്രായമായ ഗര്‍ഭസ്ഥശിശു ചികിത്സക്കിടെ മരിച്ചത്. മോഡേണ്‍ ആശുപത്രിയുടെ ചന്തപ്പുരയിലെ അനക്‌സില്‍ ചികിത്സയിലായിരുന്ന ഇവര്‍ക്ക് ആവശ്യമായ ചികിത്സകള്‍ ലഭിക്കാത്തതിനെ തുടര്‍ന്നായിരുന്നു മരണം സംഭവിച്ചതെന്നായിരുന്നു പരാതി. ഇതേതുടര്‍ന്ന് നഗരസഭാ ചെയര്‍മാന്‍ നടത്തിയ ചര്‍ച്ചയിലാണ് വേണ്ടത്ര സൗകര്യങ്ങളില്ലാതെ ആശുപത്രി ഒ.പി വിഭാഗം തുറന്നു പ്രവര്‍ത്തിക്കേണ്ട എന്ന നിര്‍ദേശം ഉയര്‍ന്നതും.
തുടര്‍ന്ന് ആശുപത്രി ഒ.പി വിഭാഗം അടക്കുകയുമായിരുന്നു. പിന്നീട് യാതൊരു ഒരുക്കങ്ങളും നടത്താതെ തിങ്കളാഴ്ചമുതല്‍ ഒ.പി തുറന്നുപ്രവര്‍ത്തിക്കുകയും ചികിത്സ ആരംഭിക്കുകയുമായിരുന്നു. ഇതറിഞ്ഞ് രോഗിയുടെ ബന്ധുക്കളും കേരള മഹിളാസംഘം പ്രവര്‍ത്തകരും രാവിലെ ആശുപത്രിയിലെത്തി സത്യാഗ്രഹം ആരംഭിക്കുകയായിരുന്നു. സംഭവമറിഞ്ഞ് നിരവധി നാട്ടുകാരും പൊലിസും രംഗത്തെത്തി. നഗരസഭാ ചെയര്‍മാന്‍ സി.സി വിപിന്‍ ചന്ദ്രന്‍ ഉച്ചയോടെ ആശുപത്രിയിലെത്തുകയും അധികൃതരുമായി ചര്‍ച്ച നടത്തുകയും ചെയ്തു. അഞ്ച് തീരുമാനങ്ങളുടെ അടിസ്ഥാനത്തില്‍ സത്യഗ്രഹസമരം പിന്‍വലിക്കുവാനും, തീരുമാനം നടപ്പിലാക്കുന്ന മുറക്ക് ഒ.പി വിഭാഗം തുറന്നു പ്രവര്‍ത്തിക്കുവാനും തീരുമാനമായി.
അനക്‌സിലെ പ്രസവ വിഭാഗത്തില്‍ ഒരു ഡോക്ടറുടെകൂടി സേവനം ഉറപ്പുവരുത്തും. കൂടുതല്‍ യോഗ്യതയുള്ള നഴ്‌സുമാരെയും ജീവനക്കാരെയും ഇവിടേക്ക് നിയമിക്കും. ആധുനിക ഉപകരണങ്ങളും സംവിധാനങ്ങളും ഉപയോഗപ്പെടുത്തി പ്രസവ വിഭാഗം ശക്തിപ്പെടുത്തും. ആശുപത്രിയിലെ സൗകര്യങ്ങള്‍ ഉറപ്പുവരുത്തുന്നതിന് നഗരസഭാ ചെയര്‍മാന്‍, ആശുപത്രി അധികൃതര്‍, പൊലിസ് അധികൃതര്‍, മിനി ഷാജി എന്നിവരടങ്ങിയ മോണിറ്ററിങ് കമ്മിറ്റിയെ നിയോഗിക്കുവാനും തീരുമാനമായി.
ചര്‍ച്ചയില്‍ നഗരസഭാ ചെയര്‍മാന്‍ സി.സി വിപിന്‍ ചന്ദ്രന്‍, ആശുപത്രി ഡയറക്ടര്‍മാരായ പി.എം മുഹമ്മദ് യൂസഫ്, അബ്ദുല്‍ റഷീദ്, സി.ഐ പി.സി ബിജുകുമാര്‍, എസ്.ഐ മുകുന്ദന്‍, ഡോക്ടര്‍മാരായ പി.വി സുഗതന്‍, പി. മുരളീധരന്‍, ജോസ് ഊക്കന്‍, അഡ്വ. എ.ഡി സുദര്‍ശന്‍, മിനി ഷാജി, ബി.എ ഗോപി പങ്കെടുത്തു.