റിയാദ്: എന്‍ജിന്‍ തകരാര്‍ കണ്ടെത്തിയതിനെ തുടര്‍ന്ന് ഇത്തിഹാദ് എയര്‍ വിമാനം അബുദാബിയില്‍ അടിയന്തരമായി തിരിച്ചറിക്കി. യാത്രക്കാരെല്ലാം സുരക്ഷിതരാണ്. സിഡ്‌നിയിലേക്ക് യാത്ര തിരിച്ച ഇത്തിഹാദ് എയറിന്റെ ഇ-വൈ 450 വിമാനമാണ് യാത്ര തുടങ്ങി അര മണിക്കൂറിന് ശേഷം ഒരു എന്‍ജിന്‍ പ്രവര്‍ത്തനം നിലച്ചതിനെ തുടര്‍ന്ന് അബുദാബി വിമാനത്താവളത്തില്‍ തിരിച്ചിറക്കിയത്. ബോയിംഗ് 777-330 ഇനത്തില്‍ പെട്ട ഇരട്ട എന്‍ജിനുള്ള വിമാനമാണിത്.

329 യാത്രക്കാരുമായി പറന്നുയര്‍ന്ന വിമാനം സുരക്ഷിതമായി തിരിച്ചിറക്കിയെന്നും യാത്രക്കാരെല്ലാം സുരക്ഷിതരാണെന്നും ഇത്തിഹാദ് എയര്‍ വ്യക്തമാക്കി. പൈലറ്റും മറ്റു വിമാന ജീവനക്കാരും വിമാനത്തിനുള്ളിലും വിമാനത്താവളത്തിലും എല്ലാ വിധ അടിയന്തരസാഹചര്യം നേരിടാന്‍ തയ്യാറായിരുന്നു. ഇടിച്ചിറക്കിയതിനെ തുടര്‍ന്ന് വിമാനത്തിന്റെ ടയര്‍ പൊട്ടി തെറിച്ചതായി ഒരു യാത്രക്കാരന്‍ മാധ്യമങ്ങളോടു പറഞ്ഞു.