മദീന/കൊച്ചി: മദീനയില്‍ നിന്നുള്ള ഇന്ത്യന്‍ ഹാജിമാരുടെ മടക്കയാത്ര ഇന്ന് മുതല്‍. കേരള ഹജ്ജ് കമ്മിറ്റി മുഖേനയെത്തിയ മലയാളി തീര്‍ഥാടക സംഘമാണ് മദീനയില്‍ നിന്നും നാട്ടിലേക്ക് തിരിക്കുന്ന ആദ്യ ഇന്ത്യന്‍ സംഘം. ഇന്ന് വൈകിട്ട് നാലിന് സഊദി എയര്‍ലൈന്‍സിന്റെ ആദ്യവിമാനത്തില്‍  450 പേരും പിന്നാലെ രാത്രി 10.25 ന് രണ്ടാമത്തെ വിമാനത്തില്‍ 450 പേരുമാണ് എത്തുന്നത്. ഒക്ടോബര്‍ 14 വരെയായി 43 വിമാനസര്‍വിസുകളാണ് കൊച്ചിയിലേക്ക് സഊദി എയര്‍ലൈന്‍സ് ക്രമീകരിച്ചിരിക്കുന്നത്. പുറപ്പെട്ട ക്രമത്തിലാണ് തിരികെ മദീനയില്‍ നിന്ന് ഓരോ സംഘങ്ങളും എത്തിചേരുക.
മദീനയില്‍ നിന്ന്  കൊച്ചി വിമാനത്താവളത്തിലേക്ക് എത്തുന്ന ഹാജിമാരെ പ്രത്യേകം സജ്ജമാക്കിയ ഹജ്ജ് ടെര്‍മിനലില്‍ കസ്റ്റംസ്, എമിഗ്രേഷന്‍ പരിശോധനകള്‍ നടത്തി വേഗത്തില്‍ വീടുകളിലേക്ക് യാത്രയയ്ക്കുന്നതിനുള്ള ക്രമീകരണങ്ങളാണ് നടത്തിയിരിക്കുന്നത്.
ഹജ്ജിന്റെ ചുമതലകൂടിയുള്ള തദ്ദേശസ്വയംഭരണവകുപ്പ് മന്ത്രി കെ.ടി ജലീല്‍, സംസ്ഥാന ഹജ്ജ് കമ്മറ്റി ചെയര്‍മാന്‍ കോട്ടുമല ബാപ്പു മുസ്‌ലിയാര്‍, ഹജ്ജ് കമ്മറ്റി അസി.സെക്രട്ടറി ഇ.സി മുഹമ്മദ് എന്നിവരുടെ നേതൃത്വത്തില്‍ തിരികെയെത്തുന്ന ഹാജിമാരെ സ്വീകരിക്കും.  130 വളണ്ടിയര്‍മാര്‍ ക്യാംപിന്റെ രണ്ടാംഘട്ടത്തില്‍ പ്രവര്‍ത്തിക്കും.  സംസ്ഥാന ഹജ്ജ് കമ്മിറ്റി മുഖേന കൊച്ചിയില്‍ നിന്നും മക്കയിലെത്തിയ കേരളം, ലക്ഷദ്വീപ്, മാഹി എന്നിവിടങ്ങളില്‍ നിന്നുള്ള 10,584  തീര്‍ഥാടകര്‍ മദീനയില്‍ നിന്നുമാണ്  മടങ്ങുന്നത്. ഇതില്‍ പകുതിയിലധികം പേരും മദീനയില്‍ എത്തിചേര്‍ന്നിട്ടുണ്ട്. കേരളത്തില്‍ നിന്നും 10227 പേരും ലക്ഷദ്വീപില്‍ നിന്നം 289 പേരും മാഹിയില്‍ നിന്നും 28 പേരുമാണ് കൊച്ചി വഴി മക്കയിലെത്തിയത്.